Moscow, Nailur:
U President ka Russia, u Vladimir Putin ha ka Sngi Balang, u la pdiang sngewbha ia u nongialam jong ka North Korea- u Kim Jong Un uba la leit poi sha Russia na ka bynta ka jingiakren ban pynpoi ia ki tiar thma jong ka North Korea sha ka Russia. Kane ka jingthmu ka long khnang ba ka Russia kan ioh ban pyndonkam ia kitei ki tiar hapdeng ka jingiakhun thma jong ka pyrshah ia ka Ukraine ha kine ki sngi ban wan. La ong ba ka North Korea ka la iaid shakhmat haba iadei bad ka jingthmu jong ka kumba ka la pynbna ha kine ki sngi ba la leit ba utei u nongialam un sa leit sha Russia ban iakynduh markhmat bad u nong-ialam ka Russia na ka bynta ban pynbeit ia ka jingpynpoi ia kitei ki tiar thma bad la ong ruh ba ka North Korea ha kane kan kynti, kam shym pynsngap shuh ia ki jingmaham jong kiwei pat ki ri khamtam ia ka United States kaba la maham ia ka ba kam dei ban leit ai jingkyrshan ia ka Russia ha ka jingleit hiar thma jong ka sha Ukraine.
Kumta la ong ba ka North Korea khlem jingsalia, ka la rai ban ai jingkyrshan ia ka Russia wat la kan shah pynngat kyndon ne shah pynkut ki jingiadei kam bad kiwei pat ki ri hadien-habud.
Ha katei ka sngi, u Putin u la pynpaw ia ka jingsngew kmen halor ka jingleit poi jong utei u nongialam ka North Korea ban ai jingkyrshan ia ka Russia ha ki kam bad ki rai jongka bad kumta ruh u la pdiang sngewbha ia utei u nong-ialam ka North Korea da ka tamasa kaba heh bad ha ka rukom kaba ishong-kun bha, kum shi bynta ban pynpaw ia ka jingsngew burom bad jingsngew ieid halor ka jingkloi jong utei u nong-ialam ban ai jingkyrshan ia ka Russia ha kum kane ka por ba kiwei pat ki ri kiba bun ki la kynran dien bad ieh noh ia ka Russia.
Ha kajuh ka por ruh ka South Korea pat ka la iathuh ba, katba u Kim u dang leit poi sha Russia, ka North Korea pat ka la pynher biang sa 2 tylli ki ‘namding ha ka Sngi Balang.
Ha katei ka jingiakren jong kitei ki 2 ngut ki nongialam, la suba ba ka Russia kan pan ia ki ‘namding ba khlaiñ bor jong ka North Korea bad kumjuh ruh ki tup thma ban nang pynkhlaiñ shuh shuh ia ka tnat shipai ka Russia ha ka jingiakhun pyrshah ia ki shipai ka Ukraine kiba la ioh ia ki tiar iakhun bad ki tiar thma na kiwei pat ki ri kiba ai jingkyrshan ia ka Ukraine.
Haba iadei bad kane, ka United States ha ka taiew ba la leit u la ong ba lada ka North Korea kan leit ai jingkyrshan ia ka Russia ha kane ka thma, kan hap ban kit khlieh hi lada don kano kano ka jingjia hadien habud bad ka North Korea kan hap shah pynngat kyndon ha kiwei pat ki ri namar ka jingiadon kti jongka ha ka thma jong ka Russia.
Nalor kane, ka US bad ka South Korea, ki la maham ruh ia ka North Korea na ka por sha ka por ba kan sangeh noh ia ka jingpynher ‘namding ba khah- khah namar kan wanrah jingma ia ki para ri ba marjan. Hynrei la ong ba ka North Korea kam ju pynsngap ia ka jingmaham jongki bad iaid la ka jong ka lynti, ha la ka jong ka mon.
