Shillong, Nailur:
Ka Directorate of School Education And Literacy ka jylla ha ryngkat ka jingïatreilang bad ka The Regional Science Centre, Guwahati (National Council Of Science Museums, Ministry Of Culture, Government Of India) hynne ka sngi ka la pynlong ïa ka State Level Student’s Science Seminar-2023 halor ka phang “Millets- A Super Food Or A Diet Fad”.
Ïa katei ka State Level Student’s Science Seminar-2023 la pynlong ha Meghalaya Bharat Scouts and Guides, Pine Mount Ridge, Laban, Shillong.
Ha katei ka sngi u kongsan u dei u Swapnil Tembe, IAS, Director of School Education & Literacy ka jylla bad ka shongknor ka dei ka Kong Isabella Sohtun, Deputy Director Of School Education & Literacy ka jylla.
Haba ai jingkren ha katei ka sngi, u Swapnil Tembe, IAS, Director of School Education & Literacy ka jylla, u la ong ba ha kane ka juk mynta ka la pynsuk bha ïa ki khynnah skul ba kin ïoh ïa ka jingnang jingtip tang lyngba ki ‘mobile phone’ ym kum ha ki por kiba mynshwa ba lada kwah jingnang jingtip eiei ha kaba ïadei bad ka kot, ki hap ban leit sha ki ‘library’ lane ki thiar kynshew kot.
U la ong ba wat la ka por bad ka juk ka la ïaid ban pyndonkam da ki mobile phone ban wad jingnang jingtip, hynrei ka jingpynmlien ban pule da ki kot kan ïarap shikatdei eh.
“Ki don shibun ki jingai jingmyntoi ba ka sorkar pdeng bad ka sorkar jylla ka ïaleh man la u bnai ban kyntiew ïa u krai namar u dei u jingbam uba tei ïa ka met ka phad hynrei une u jingbam um pat ïoh ïa kata ka jingithuh bad kumta ki dang don shibun kiba ngi dei ban leh”, la ong utei u IAS.
La ïoh ïa ka jingkren pdiang sngewbha na ka Kong A. Kharpuri, Special Officer (Science Education) Directorate of School Education & Literacy ka jylla.
Shuh shuh la ïoh ruh ïa ka jingrwai na ka skul Little Flower Secondary School, Shillong, ka jingsam ïa ki khusnam sha ki khynnah skul kiba la jop ïa katei ka jingïakhun bad la ïoh ïa ka jingkren ai khublei na u Bah S.A War, Technical Assistant for Science Education, Directorate of School Education & Literacy ka jylla.
