Jowai, Nailur 13
Ka Lion ka la jam sha ka semi final ha ka lympung ïalehkai 2nd Division Football Tournament na ka bynta ka 6th Debo Shullai Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah ban pynliem ïa ka Iawmulong Nartiang da 3-0 kol ha ka jingïakhun quarter final kaba nyngkong kaba la long ha madan Kiang Nangbah Stadium Ladthadlaboh, Jowai ha ka sngi Balang.
Ha kane ka jingïakhun ka Lion SC ka la lah ban ïalehkai bha naduh kaba sdang da kaba ïoh ïa ki kabu kiba biang. U Chanmitre Dkhar u la ïoh ban thep marwei ar kol ha ka minit kaba 22 & 77, katba ïa kawei pat la pynbud da u Banteibor Syngkrem ha ka minit kaba 59 na ka bynta ban khur syndon ïa ka jingjop.
Haba phai sha ka lympung ïalehkai (L) Kesilroy Pala Invitation Football Tournament 2023, u Donald Diengdoh ula khyrwit da ka hat-trick na ka bynta ban pynlong ïa ka Salaroh ba kan khur ïa ka jingjop hadien ba ka la pynliem noh ïa ka War Jaiñtia Veteran FC da 4-2 kol.
Ïa ki kol jong ka Salaroh la thep da u Apborlang Kurbah ha ka minit kaba 32, katba u Donald Diengdoh ula khyr ïa ka hat-trick hadien ba u la ïoh ban thep ha ka minit kaba 34, 36 & 51. Katba ïa ki ar kol jong ka War Jaiñtia Veteran la thep da u Rooney Lamin (16) bad u Bless Pamthied (54).
