Nongpoh, Nailur 13
Ka kynhun U-17 ki ‘thei ïalehkai phutbol ka Saiden Secondary School ki ban mihkhmat ïa ka Jylla ban leit shim bynta ha ka 63rd National Level Subroto Cup 2023, ha ka sngi Ba-ar ki la shah pynkup burom kyrpang ryngkat ki jingkyrkhu kyrdoh ha shwa ba kin mih ban leit ïashim bynta sha katei ka lympung ka ban sa long ha ka nongbah New Delhi.
Ha kane ka jingïalang kaba la pynlong ha ka Ïing Dorbar jong ka shnong Saiden, la wan ban ïadon bynta lang da u Bah Donlang Sohkhlet, Vice Chairman ka Meghalaya Employment Generation Council, u Bah Bobby L. Nongbet, District Sports Officer ka Ri Bhoi, ki nongïalam seng ba kynthup ïa u Bah Ferdynald Kharkamni, President ka KSU NKHD, Bah Marcus Marten, President ka HNYF NR, u Rangbah Shnong ka Saiden, Bah E.K Lapang lem bad ki nonghikai, ki khynnah pule jong ka skul ba la wan ban synran lang da ki kmie ki kpa.
Haba ai jingkren ha katei ka sngi, u Bah Donlang u la ai jingïaroh sha katei ka kynhun jong ki ‘thei ïalehkai ka Saiden Secondary School kiba la trei shitom kat haduh ba kin lah ban khur ïa ka nam lahduh ha ka District bad ka Jylla ruh kumjuh wat hapdeng shibun ki jingduna kiba kum ka skul bad ki ‘thei ïalehkai ki ïakynduh.
U la ong ruh ba ym lah ban len ba ka skul hi ka dang donkam shibun ki jingïarap na ki bor sorkar, hynrei ka jingminot bad ka jinglen ban lade jong ki ‘thei ïalehkai katei ka skul ka la pynlong ïa ki ban poi shaduh kane ka thong kat haduh ban ïoh mihkhmat syndon ïa ka Jylla kaba long pat ka burom ïa ka skul, ka shnong ka thaw, ki kmie ki kpa bad ruh ïa ka jylla hi baroh kawei.
Na ka liang u Bah Sohkhlet u la ai ruh ïa ka jingkyrkhu kyrdoh sha ka kynhun ba kan lah ban leh bha ban ïakhun pyrshah ïa ki skul na kiwei pat ki Jylla ba kin ïoh ban rah ïa ka nam lahduh ha ka ri da kaba kyntu ruh ïa ki ba ki dei ban long kiba kohnguh sneng, kiba don ïa ka akor ka burom bad khamtam eh ba kin pynleit jingmut kyrpang ha katei ka sap kaba ki don khnang ba kin lah ban poi sha ka thong jong ka jingjop.
Kum shi bynta ban ai mynsiem bad ban pynshlur shuh shuh ïa kitei ki ‘thei ïalehkai, na ka liang u Bah Donlang, u Bah Ferdynald Kharkamni bad u Bah Marcus Marten, ki la noh synñiang da ka pisa sha ki bor pynïaid skul, ka Dorbar Shnong Saiden ka la ai ïa ki jingai sngewbha sha ki ‘thei ïalehkai, katba uwei na ki samla rangbah kane ka shnong, u samla Bakmen Thangkhiew, u la ai sngewbha da ki baje kane ka juk stad mynta kiba la tip kum kita ki smart watch sha baroh ki ‘thei ïalehkai kum ka dak jong ka jingai mynsiem bad kyrkhu kyrdoh ïa ki.
Kane ka kynhun ïalehkai jong ka skul Saiden, kaba la ïalam da u Bah Sumarlang Swer kum u Coach bad ka Kong Rida Lyndem kum ka Manager, kan mih na kane ka Jylla ha ka 16 tarik mynta u bnai hadien ka jingshah hikai pyntbit kumba katto katne por ha ka nongbah Shillong ha kine ki khyndiat sngi kiba la dep.
Ha katei ka lympung Subroto Cup, kane ka kynhun jong ki thei ïalehkai ka Saiden Secondary School, ki la shah pynngat ha ka Pool-G ban ïakhun pyrshah ïa ki lahduh na ka jylla Goa, Uttarakhand bad ka Kendriya Vidyalaya Sangathan bad ka jingïakhun ba nyngkong kan dei ha ka 20 tarik pyrshah ïa ka Goa.
