“Dei ha u rangbah keiñ,
Ka shong ka mon ba jwat,”
ïa u phi lah ban beiñ,
Hynrei kumno phin rat !”
“Kum u nga dei ban leit
Ngan pat rangbah ruh jrain,
Ko khun ka shnong, ha peit,
Kum nga ïeng rangbah jwain.”
Kitei ki dkhot ba la shim na ka Duitara Ksiar ba la thoh da u Babu Soso Tham ki pynkynmaw ïa ngi ban ïathuh shai ka mut aiu ban long u RANGBAH. U briew uba tip bad ba – nang ban shaniah na kiwei. Kane ka jingnang ban shaniah ïa lade ka wan bad mih, lah ban ong, na ka jinghikai ba la pynsan ïa u khynnah naduh ba u dang rit ba un long u RANGBAH.
Kam dei ka jingpnah ktien kaba kiwei ki lah ban sha-ñiah, hynrei dei ka jinglong rangbah, ka jingnang ban bat la ka ktien wat la dei ban ïap ruh bad ka jingwad ïa ka jingshisha ba ïa u briew la pynlong ïa u, u Rangbah.
Kumno yn lah ban shaniah ïa u briew uba lah ban kylla kumba kylla ka suiñbneng man la ka khyllipmat ? Kumno yn lah ban shaniah ïa uta u briew uba nang tang ka ktien hynrei haba dei pat ki kam, u kylla jutang bad u pynlong kam kai lut khait ïa kiei kiei kiba shisha bad kiba ktah ïa ka ïap ka im ? Kumno yn lah ban shaniah ïa uta u briew uba ksan rympei bad uba rem dorbah ? Khlem pep yn ym lah da lei lei ban shaniah kum ïa uta u briew bad kum uta u briew um dei u RANGBAH. Ha u kam shong ka mon ba jwat.
Namarkata, ka ïing ka sem, ka ïit ka hima bad ka jaidbynriew ka donkam ki briew kiba long ki RANGBAH kiba la ’em’ te ka long ka ’em’ bad ka haoid’ ruh ka long ka ‘haoid.’
“Kum nga ïeng rangbah jwain,” ki long ki kyntien kiba u nongthoh poitry u kyntu ïa ki khun ka Ri ba kin bud nuksa. Ka Ri ka donkam ki RANGBAH. Kumta ka dawa ba kine ki khynnah bad samla kiba mynta dei ban pynsan bad pynrangbah ïa ki ha ka rukom ba ki dei ban long ki RANGBAH. Dei kine ki khynnah bad ki samla ki ban hap bah khala bad kyrshan ïaka Ri. Kine ki hap ban long ki rishot jong ka. Lada kine ki rishot ki pyut bad ki long kiba tlot ka jingmut jingpyrkhat kumno kin lah ban bah khala ïa ka Ri. Khlem pep kata ka ri bad ka jaidbynriew kan duh kan dam bad jot thiaw.
Kam biang ïa ki kmie ki kpa tang ba ki la lah ban pynbiang ïa la ki khun ïa ka kup ka sem ne ka bam ka dih ne ka leit skul wan skul lada ïa ka nongrim jong ka jinglong briew bad jinglong mynsiem la buh noh sha kyndong khlem da ker bad sara bha.
Ka juk kaba mynta ka dawa ba ngi dei ban peit ngor. Lada ka jaidbynriew kam kheiñ kor ïa ka nongrim kan kylla prah. Hynrei haba don ki RANGBAH pat, kine ki peit ki jngoh, ki sumar bad pynkynmaw ïa ka jaidbynriew ba kan ïai sumar bad ri kyndong ïa ka nongrim bad ka Thymmei – ri.
[U Nongsaiñ Hima, 1969]
