Shillong, Nailur 13
Ka FKJGP Mawlai Circle kan pynkut noh ïa ka IXth Inter School Knock-Out Football Tournament ha ka 15 tarik mynta u bnai ha Madan Heh Mini Stadium Mawlai Phudmuri ha ka por 3 baje janmiet.
Ha kane ka lympung la don 15 tylli ki skul kiba la wan ban ïashim bynta. Ka Seng man la u snem ka ju pynlong ïa kane ka lympung kum shi bynta ban wanrah ïa ka jingkoit jingkhiah bad ban pynshlur ïa ki khynnah pule ba kin shim bynta ha ki kam ïalehkai lane kilan met ban lait na kino kino ki kam lane ki jingdih kiba sniew. Ha une u snem na ka liang ka Seng ka la buh ruh ïa ka phang pdeng kaba ong “Em ïa u Drok, Hooid ïa ka Phutbol”.
U kongsan ha katei ka sngi un long u Bah Eldie N. Lyngdoh General Secretary ka FKJGP Sengkmie bad u symbud kongsan un long u Bah Kitboklang Nongphlang, Vice President FKJGP Sengkmie bad u Bah Tamdor Nadong kum u nongshah khot sngewbha.
Ki ar tylli ki skul ki ban ïaknieh ïa ka nam lahduh kin long hapdeng ka Umrynjah Presbyterian School pyrshah ïa ka Christ Church Morning School. Kumta na ka liang ka Seng ka wer ia baroh naduh ki samla, longkmie-long-kpa bad khamtam ïa ki paidbah kiba ïeid ïa ka phutbol ba kin ïapoi ban sakhi ïa katei ka jingïalehkai ka ban long ha katei ka sngi.
