Bucktown, Nailur:
Katkum ki khubor la ong kiba bun ki skul ha kylleng jong ka Philadelphia ki la shah bthah ban khang khyrdep noh shwa shipor bad kumjuh ruh la bthah ia ki paidbah nongshong shnong ba kin ym mih shabar na ki iing-ki sem lajong hadien ba uwei u runar na Brazil uba shyrkhei tam u la lait na ka patok ha United States bad u la kurup ruh ia ka suloi na ki briew ha katei ka sngi.
Ia utei u runar la ithuh kum u Danelo Cavalcante, bad u la phet na ka patok ha Chester County ha ki ar taiew ba la leit bad katei ka jinglait phet jong u, ka la long ka mat kaba wanrah jingsyier shibun ia ki paidbah nongshong shnong bad ia ki nongleit- nongwan namar ka jinglong ba shyrkhei jong utei u runar, naba u lah ruh ban kiar bad iaid lait wat na ki ksew pulit, ki drone, ki helicopter bad wat na ki shipai kiba la pyntbit bha ruh.
Kumta, ki bor pyniaid ki la khang noh ia ki surok ha ki bynta jong katei ka thaiñ, kumjuh ruh ha ki bynta ba kyndong jong ka Bucktown ha Pennsylvania, ha kaba la phah ruh ia ki pulit SWAT bad ki kali pulit ba la pynkhlaiñ bha.
Utei u runar naduh ba u lait phet na patok ha ka 31 tarik u Nailar da kaba kiew na ki kynroh ba jrong jong katei ka patok, u la ioh ruh ban tuh ia ki jaiñ phong, ki jingbam bad kawei ka kali ‘Van’, ha kaba hadien u la ieh noh ia katei ka kali ha kawei ka jaka hadien ba u la leit khap shñiuh, khur tmaiñ bad pynkylla dur ialade katba u lah, khnang ban ym don ba suba sniew ia u. Une u runar u la don 34 snem ka rta.
Hynrei, ha ka miet jong ka Sngi Nyngkong, la ong ba utei u runar u la leit rung sha kawei ka iing hajan Bucktown bad u la leit ban lute ia ka suloi 22.Caliber, kaba don ia ka ‘Scope’ bad ‘Flashlight’ ba la pyndait kyrpang ha ka.
Dei ha katei hi ka miet ba la ioh jingtip shaphang katei ka jingleit lute jong u, ki pulit bad ki bor pyniaid ki la maham ia ki paidbah ba kin khang bha ia ki iing- ki sem jongki bad ban phikir bha nangne shakhmat namar ka jingdon jong utei u runar ha katei ka thaiñ ka long kaba ap jingma shibun ia ka jingim jong ki riew paidbah.
Kane ka jinglait phet jong u Cavalcante ha kane ka por, ka long hadien ba u la shah rai ban pynshong patok baroh shi jingim halor ka jing pyniap jong u ia la ka jong ka samla, hakhmat ki khun jongka ha u snem 2021. Utei u runar u dei ruh u ba la shah thwet ha ki pulit ka Brazil naduh ki por ba la leit.
Na ka liang ka kmie jong u Cavalcante, kaba shong- ba sah ha Brazil, haba iakren bad ki lad pathai khubor, ka la iathuh ba kane ka khubor lait phet jong u khun jongka, kam shym pyn lyngngoh eiei shuh ia ka namar u la dep leh hi kumne kumjuh naduh ka por ba u dang shong ha ka patok hapoh Brazil hadien ka jingdon kti jong u, ha ka jingpyniap ia uwei u briew hapoh Brazil.
Hynrei wat da ka kmie jong utei u runar, ka la pynpaw ia ka jingbym sngew shngaiñ jong ki riew paidbah lada u khun jongka un dang iaid bakla bad leh ia kajuh- shi kajuh ka kam runar katba u dang im bad kumta ka la ong ba kan kham bha ia u ba un iap noh, ban ia kaba un shong patok baroh shi jingim hapoh ka ri United States bad ba un hap ban iap syrtok hapoh jong katei ka patok.
U Cavalcante, u don kumba 5 phut ha ka ryngïeng jing jrong bad watla katta, ki pulit ki la pynbna ia u kum uwei na ki runar uba shyrkhei tam bad uba buh jingma ia ka jingim jong kiwei pat.
