Beijing, Nailur:
Hadien ka jingshah lynshop ha u ‘lapbah bad ka lyer kaba jur ha ki bynta ba Shathie ka China, la ong ba 7 ngut ki briew ki la duh noh la ka jingim bad da ki khat’ tam ki kuratia ki la phet lamwir na ki jaka ba la buh ia ki.
Ki bor pyniaid ka China ki la maham ruh ia ki nongshong shnong ba marjan bad katei ka thaiñ ba kin shongkhop hapoh ki iing ki sem jongki katba ka jinglong- jingman jong ka suiñ bneng kam pat i-shngaiñ bha bad la ong ruh ba kumba 70 tylli ki kuratia ki la lait phet na Maoming ha katei ka jingiaphet lymwir namar ka jingshah lynshop ha ki bor ka mariang ha ki bynta West jong ka Guangdong.
Ha kajuh ka por la ong ba ha katei ka jingjia, kumba 7 ngut ki la khlad noh bad 3 ngut ki la shu jah rngai khlem lap ne iohi syrngiew shuh hadien ka katto katne tylli ki jingjia twa ha ki bynta jong ka nongbah Yulin hapoh ka thaiñ Guangxi.
Kumjuh ruh ha ka taiew ba la lah, u slap u ba jur u la wanrah ia ki jingjia shlei um hapoh Hong Kong, ha kaba 2 ngut ki la khlad noh bad bun tylli ki bynta jong katei ka nongbah ki la ioh mad ia ka jingshlei um hadien ka jingther biang jong u slap ha ka Sngi Nyngkong.
U nongialam ka Hong Kong, u John Lee u la pynbna ba ka Sorkar kan sa wanrah ia ki lad jingiarap ba kyrkieh naka bynta kito ki lanot kiba mad ia katei ka jingshlei um bad ka jingshah lynshop ha ki bor ka mariang ha kitei ki khyndiat sngi ba la leit.
