Lausanne, Nailur:
Katkum ka jingpule bniah jong ka tnat na Switzerland, la ong ba kito ki khyllung-khynnah kiba heh ba san ha ki shnong kiba don hapoh ki nongbah ba la kham bit- kham biang, ki ju don beit ia ki jingshitom ha ka ban ring mynsiem. Kane ka pyni ba kito kiba im ha ki jaka nongkyndong ki kham biang bad kham shait- kham khlaiñ ban ia kito kiba im ha ki jaka sor bad ha ki nongbah.
Shuh shuh ruh la ong ba katkum ka jingpule bniah jong ka European Respiratory Society International Congress na Milan jong ka ri Italy pat, la ong ba kito ki paidbah kiba im ha ki jaka kiba don hajan ki surok bah, lane ha ki jaka ba bun kali bad ba kham heh iew, ki ju don ia ki jingshitom shadem khamtam ha ki khynnah rit, hynrei, lada ka kmie ka ai buiñ bha ia ki khyllung naduh ka por ba dang kha, kane kan iarap ban pynduna ia ka jingma na ka jingngat ia kum kitei ki jingshitom ha ki khynnah hadien- habud ynda ki la heh- la san.
Ia kane, kitei ki tnat ki la pule bad wad bniah khnang hadien ba shem ia ka jing bym shait- bym khlaiñ jong ki khynnah ha kine ki sngi.
Ia ka kaiphod ba nyngkong, la pyllait da u Dr. Nicklas Brustad, uba long u nong pule bniah haba iadei bad ka Copenhagen Prospective Studies on Asthma in Childhood (COPSAC) na ka Gentofte Hospital bad ka University of Copenhagen kaba don ha Denmark. Ha kitei ki jingpule bniah jong kitei ki tnat, la kynthup ia 663 ngut ki khynnah bad ki longkmie kiba la ïashim bynta lang baroh hapoh katei ka jingwad bniah bad jingpule bniah jong kitei ki tnat.
Ki nongpule bniah, ki lap ruh ba ki khyllung hapoh jong ka rta ba 3 snem, kito kiba sah ha ki bynta sor bad ki jaka ba kham long nongbah, ki ju don ia 17 tylli ki jingshitom ring mynsiem, kum ka jyrhoh bad kiwei- kiwei.
Haba la peit thuh ruh ia ka jinglong jingman jong i khyllung ba dang pun ha ki longkmie ba armet, la shem ba kito ki khyllung ba la pun na ka kmie kaba shong ha ki thaiñ sor bad thaiñ nongkyndong, ka don shibun ka jingiapher bad ki khyllung ba ki pun kim da don ia ka bor ban ialeh pyrshah ia ki khñiang jingpang kiba pher kiba wan ban rung ha ka met jongki.
Kumta, u Dr.Brustad, u la ong ba katkum ka jingpule bniah jong u, la shem ba ki khynnah kiba heh- ba san ha ki jaka sor, ki don ka jingma na ki jingshitom ring mynsiem bapher bad kane ka long namar ka jing jaboh jong ka lyer kaba ki ioh ban ring mynsiem ha kitei ki jaka ba ki shong- ki sah naduh ka por ba dang kha haduh ba kin da heh- da san.
