Libya, Nailur:
Ki bor pyniaid jong ka Libya ha ka Sngi Palei ki la iathuh ba katba ki tnat iarap ki dang ialeh ban tih ia ki jaka ba la shah tap khyndew bad shah tap ktieh hadien jong ka jingshlei um, la shem ruh ia bun tylli ki metiap jong ki lanot kiba la ngat ha katei ka jingjia ba sniewbok. Kumta ruh ha katei ka sngi, ki bor pyniaid ka Libya ki la ong ba ka jingdon jong kiba khlad na katei ka jingshlei um, ka dang lah ban kiew shuh- shuh bad kane ka lah ban kham kiew ha ki bynta mihngi jong ka Libya ba katei ka jingshlei um ka la kham ktah jur bha.
U heh ka nongbah Derna, kaba long ka nongbah ba la shah ktah jur tam ha katei ka jingshlei um hadien ka jingtwa jong 2 tylli ki dam ha katei ka ri bad la ong ba ka ‘erlangthari kaba jur ka la khie ha ki khyndiat sngi ba la leit ha ka por shiteng miet katba ki briew ki dang iohthiah hapoh ki iing ki sem jongki bad kaba la pynlong ruh ia kitei ki dam ba kin twa na ka jingjur jong katei ka ‘erlangthari kaba khie ha katei ka miet.
Ki bor pyniaid ka Libya ki la ai jingkheiñ ba ki don kumba 5,300 tam kiba la khlad bad duh noh la ka jingim ha katei ka jingjia bad sniewbok bad kumba 30,000 kiwei pat ki dei kiba la shah rah bad jah rngai na katei ka jingshlei um.
Ki briew jong ka tnat iarap ‘Relief Workers’ na ka Medicins Sans Frontieres, ki la leit poi sha katei ka nongbah ha ka step jong ka Sngi Palei ban leit iasnoh kti lang bad ki kynhun ‘Emergency’ kiba dang iakhun shitom ban tih ia ki jaka ba la shah tap khyndew bad ban wad ruh ioh don kiba dang im ne sahkut ha kino-kino ki jaka ba la shah tap ha kitei ki sngi.
Kumta ruh la ong ba dang don bun bah ki metiap bym pat lah ban ioh sei namar ka jingbym don jaka shuh ban buh ia ki. Namar kata, na ka liang ki kynhun iarap, ki la kyntu ia ki bor pyniaid ban phah biang kham bun ia ki byrni bad ki song ban thep ia kitei ki metiap bad ban pynpoi sha ki jaka tep kumba ju leh man ka sngi naduh ba la ioh ban sei ia ki metiap ba dang sahkut ha kitei ki jaka ba shah tap um.
