U Prof. Swell u khyllie ïa ka daw jong ka Hill State
Ha ka por ba ïa said ban pynkylla ïa ka Riti synshar (Constitution) jong ka India katkum ba la tyrwa da u Ashoke K. Sen, Law Minister, ha Parliament, u Prof. G.G. Swell ruh u la ïashim bynta. Ha ka jingkren ba sngew shongnia jong u, u la ong ba ha-dien katta snem ba ka ri India ka la ioh ïa ka Jinglaitluid, dang donkam pat dei ka Sorkar Congress ban wanrah ïa ka jingkylla ha ka Riti synshar, kata ka mut kito kiba bat ïa ka bor mynta, ki la synshar bakla bad ka jingsynshar ka jong ki ka wanrah ïa ka jingïapher jingmut bad ka jingïapait ïa pra hapoh ka ri, ha ka jaka ban nang pynkhlaiñ ïa ka jing-ïatylli hapdeng ki jaitbynriew bapher bapher jong ka ri. U la kdew sha ka ktien jylla (regional language) kum kawei ka lad ba la pynïapher jingmut ïa ki jait briew bapher bapher hapoh ka ri. U la ong ba ki Assamia ki dawa bad ki la ioh la ka jong ka ktien Assamia hapoh Assam, namar ka don ka jingai lad hapoh ka Riti synshar, wat hapdeng ka jingpyrshah jur jong ki rit paid (minorities). Kumta ki rit paid kim lah satia ban hun lemne ban ioh ki lad kiba biang ban ïashim bynta ha ka suk ka saiñ lem ne ha ki jingjynjar jong ka ri. Dei namar kata ka daw, la ong u Prof. Swell, “AI LAD ïA NGI BAN IOH LA KA JONG KA STATE KHNANG BA NGIN LAH BAN TREIKAM KUM KI NONGSHONG SHNONG BA ïA RYNGKAT”.
U NONGSAIÑ HIMA (29 tarik Kyllalyngkot, 1963)
