Baghdad, Nailur:
Ka ïingbishar jong ka Iraq ha ka Sngi Palei ka la sdien phasi ia uwei u dkhot ka Islamic State (IS) uba donkti ha ka jingpynbthei bom ha u snem 2014 kaba la shim ia ka jingim jong 17 ngut ki riewngeit ‘Pilgrims’ ha katei ka por.
Katei ka jingleit pynbthei bom ha ka phang Shatei jong ka Baghdad ha utei u snem, ka long ban leit thombor dusmon ia ka ‘Mawkeb’ kaba dei ka jaka kynshew jingbam ba shait sam sha ki riewngeit ‘Pilgrims’ hapdeng ka jingleh niam Shiite Muslim.
La ong ba kitei ki riewngeit ki ju leh niam da kaba iaid kjat kumba 100 kilometre lane 60 mile sha ka phang North jong ka Baghdad, kum shi bynta ban rakhe ia ka jingdap snem ka jingiap u Hassan al-Askari, uba long uwei napdeng ki 12 ngut ki heh nongialam niam jong ka jaitbynriew Shiite ha Iraq.
Kumta, ka ïingbishar ‘Criminal Court’ na Baghdad ha ka Sngi Palei ka la rai sdien phasi ia utei u dkhot lehnoh namar ka jingdon kti jong u ha katei ka kam thombor ka kynhun IS ha utei u snem hapoh Mawkeb ha u snem 2014.
Hynrei, la ong ba ha katei ka jingpyllait bad jingpynbna haba iadei bad katei ka rai, ka ïingbishar kam shym la pynpaw ia ka kyrteng jong utei u lehnoh hynrei la shu ring dur ia u ban pynshisha ba u long u dkhot jong katei ka kynhun bad ba la shim ia katei ka rai halor jong u, katkum ki jingleh pynkheiñ aiñ jong u hi.
La ong hadien ba ka IS ka la ioh kurup ia shibun ki bynta hapoh Iraq bad ha ka ri Syria ba marjan, ka IS ka la sdang pat ban troiñ bad duh bor noh suki- suki hadien ba kitei ki ar ri ki la pynjur ia ka jingïaleh pyrshah ia katei ka kynhun lehnoh.
Ki bor pyniaid ka Iraq ki la pynbna ruh ia ka jingjop halor ki kam thombor jong ka kynhun Sunni Muslim Extremist ha u snem 2017, hynrei la ong ba ki Jihadist ki dang iai bteng hi ban wanrah ia ki kam thombor na ka por sha ka por, khamtam ha ki jaka shong bad ki shlem treikam jong ki shipai bad ki pulit jong ka phang pdeng bad phang North jong ka Iraq.
Ha u Nailar, 3 ngut ki dkhot ka IS ki la shah sdien phasi ha Iraq halor ka jingdon kti ha ki kam thombor hapoh Baghdad ha u Naitung jong u snem 2016 bad haduh 323 ngut kiba khlad ha katei ka jingjia.
Ka Amnesty International ka la ong ba ka Iraq ka long ka ri kaba hynriew (6) ha ka pyrthei ban pyndep haduh 11 tylli ki jing phasi hapoh jong u snem 2022 ba la leit.
Kumjuh ruh la ong ba ha u snem 2022, ki don haduh kumba 41 tylli ki rai sdien phasi ba ka Iraq ka la shim ha u snem 2022 bad kumba 45 tam kiba shah sdien phasi ha u snem 2020.
