Washington, Nailur:
Katkum ki khubor la ong ba u President ka Ukraine, u Volodymyr Zelensky ha kine ki khyndiat sngi ba la lah u la iathuh ba shen un leit ban jurip sha United States ha kine ki khyndiat sngi ki ban wan, ban leit kynduh mar khmat ia u President ka United States- u Joe Biden, khnang ban ioh iakren halor ki mat jingdonkam jong ka Ukraine ha ka jingiakhun pyrshah jongka ia ka thma bad ka Russia.
U National Security Advisor- Jake Sullivan u la ong ba katei kan long ka sien iakynduh kaba 2 hapdeng u Biden bad u Zelensky ba kin iakynduh biang hapoh ka White House hadien ka jingleit jurip jong u sha White House jong ka United States ha ki por ba la leit.
La ong ruh ba ka Ukraine ka dang wad jingiarap kylleng- kylleng ban ioh jingkyrshan na ki para ri ba marjan, khnang ba kan lah ban khyllie biang ia baroh ki jingduh jongka ha ki por ba la leit bad ba kan ioh ban knieh biang ia baroh ki bynta kiba ka Russia ka la knieh na ka Ukraine.
