Dhaka, Nailur:
Ka tnat ka koit ka khiah jong ka Bangladesh, ka la maham tyngeh ia ki paidbah nongshong shnong jong katei ka ri baroh kawei halor ka jingjur jong ka jingpang khlam ‘Dengue’ bad ka jingkiew jong ka jingiap na kiba ioh kem ia katei ka jingpang namar ka jingbym phikir bad jingleh sting jong ki paidbah hapoh ka ri.
Ka World Health Organization (WHO) dang shen ka la dep maham lypa halor ka jingjur ki jingpang khlam kum ka Dengue, Zika, Chikungunya bad ka Yello Fever, kiba long ki jingpang khlam ba ju pur bad saphriang naphang na ka jingdait u skaiñ pyrjong. Hynrei la ong ruh ba kane ka jingpang ka la nang iohlad ban pur stet shuh- shuh namar ka jingkylla jong ka suiñ bneng ha une u snem.
Ka tnat Directorate General Health Services jong ka Bangladesh ka la iathuh ruh ba tad haduh ka step Sngi Saitjaiñ, ki don haduh 778 ngut kiba la khlad na katei ka jingpang khlam hapoh Bangladesh bad haduh 1,57,172 ngut kiba la shah ktah bad ioh kem ia katei ka jingpang. Hynrei la ong ba ka jingjur jong katei ka khlam ha une u snem ka long namar ba bun na kiba ioh pang kim shym pyntip sha ki tnat sumar bad ki tnat ai jingsumar ruh kim ioh ia ka jingkheiñ ba pura ban tip ia ka jingdon ba shisha jong kiba ioh pang baroh.
Ka Bangladesh ha u snem ba la leit, ka la pynbna ba u snem 2022 u long u snem uba jur tam ka jingdon kiba iap na ka jingpang Dengue, ha kaba ki don 281 ngut kiba khlad hapoh katei ka ri ha utei baroh shi snem.
Katba, lada ia nujor bad ka jinglong- jingman bad une u snem pat, katei ka jingjur ha ka jingiap ha u snem ba la leit, kam pat long eiei bad la iohi shai ba ka jingdon kiba ioh pang bad kiba khlad ha une u snem lei ka la palat bun shah ban ia kaba la jia ha kiwei pat ki snem ba ka Bangladesh ka la shah lynshop ha katei ka jingpang khlam.
