Nongstoiñ, Nailur 17
Ka long kaei-kaei kaba sngewsih kthang ïa ki kmie ki kpa, ïa ki bahaïing hasem bad wat ïa ka imlang ka sahlang ha kaba kawei ka longkmie na ka shnong Mawthawniaw kaba la mih na shnong da ka jingthmu ban leit kha ïa i khyllung sha Shillong hynrei tang na ka daw ka jingdheng kali namar ka jingpynlong ïa ka jongïakob khwai dohkha ha ka pung Pamphyrnai – kaba hap ha ka shnong Ksehkohlong, ka la duh noh ïa i khyllung hadien ba ka la kha ïa i (hapoh kali ‘tourist’ kaba shu wai) ha mar ba poi ha ka shnong Tiehsaw.
Katei ka jingjia ka la jia ha ka 16 tarik u Nailur, 2023.
Katei ka longkmie, kaba don mynta ha Holy Cross Hospital, Mairang ban phah sumar ïalade haba kren bad ki nongthoh khubor ka la ïathuh ba hadien ba ki la mih na shnong da ka jingthmu ban leit kha ïa i khyllung ha Shillong namarba la dei ka por, hynrei ynda ka la poi ha Nongspung, ka la sahkut bad ki bahaïing kiba ïadon lang ki la leit ban ïa kren ban ïa pyllait lem bad ki don katto-katne kiba ïa pyllait hynrei kiba bun kim shym la kheiñ kor ïa ka jingkyrpad hynrei ki la pynmih pynban ïa ki ktien kren heh bad kumta tang na Nongspung sha katei ka jaka ba pynlong khwai ka la shim por 3 kynta.
Ka la ong ruh ba hapdeng ka jingsuh ka jingthar hadien ba la lait na katei ka jaka ruh ynda la poi ha Umlieh, ki la sahkut biang. Kumta ka la nang pynjynjar shuh-shuh ïa ki, bad hadien kane tang mar ïa poi ha kawei na ki jaka ha Tiehsaw, katei ka longkmie ka la kha ïa i khyllung hynrei kaba sngewsih ka long ba itei i khyllung i la khlad noh.
La ïathuh ruh ba hadien kane, ïa itei khyllung la pynkit noh sha la shnong bad la pyndep ruh ïa ka jingleit ontep ha ka Sngi U Blei.
Katei ka longkmie ka la pynpaw ruh da kaba ong ba lada khlem don kano-kano ka jingsahkut kali lehse kan jyn da la poi sha ki jaka sumar ha Shillong.
Nalor ka jingjia ïa katei ka longkmie, ha katei ka sngi ba la pynlong ïa ka jongïakob khwai ha Pamphyrnai la ïohi ruh ba ka la don kawei ka kali kit nongpang kaba dang shakri ban kit ïa kiba shitom ha kaba ka hap ban mad ïa ka jingeh na ka daw ka jingshongshit jong ki briew namar katei ka jingïakob khwai ha ka pung Pamphyrnai.
Ha ka jingshisha, katei ka kali kit nongpang haba poi ha katei ka jaka ka la pynmeh ïa ka ‘siren’ bad thang ruh ïa ka bording ba rong jngum (blue) hynrei ki paidbah kim shym la sngap bad kim shym la ai lad satia bad ka hap ban sahkut ha katei ka jaka.
Halor katei ka bynta, na ka liang ki nongïaid-nongïeng ruh ki la pynpaw ka jingbynñiaw kaba jur namar ka jingdheng kali ha kaba ki la pynpaw ba ka dei namar ka jingpynïeng thurmur jong ki briew kiba leit sha katei ka jaka khwai ïa ki kali jong ki.
Halor katei ka jingjia, ka Ri Khasi Sepngi Federation Sengkmie ha ryngkat ka Hynñiewtrep Youth Council, Eastern West Khasi Hills da ka jingsngewkhia ha ka Sngi U Blei ki la leit ïakynduh ïa katei ka longkmie kaba dang shah sumar ha Holy Cross Hospital.
U samla Shembor Langrin, General Secretary ka HYC, Eastern West Khasi Hills u la ong ba ka HYC ka pynrem jur ïa katei ka jingjia ba tang na bynta ka tamasa khwai doh la duh noh ïa i khun jong katei ka longkmie kaba don hapdeng ka jingshah sumar .
“Ka HYC ka pynrem jur ïa ka jingleh ki bor distrik ha kaba ha kano ka rukom ki ai jingbit ïa ki nongseng khwai ha ki bynta bapher-bapher ha kaba wat ïa ka surok bah Nongstoiñ Shillong la i kumba ka dei ka jaka sangeh kali jongno-re-jongno ha kaba ka la buh jingeh ïa ki paidbah khamtam ïa kaba kum katei ka longkmie kaba la mad ïa ka jingsngewsih” la ong u samla Langrin.
U la ong ruh ba kane ka dei ka khubor na ka HYC ka phah sha ki bor distrik khamtam ha Eastern West Khasi Hills ha kaba ka seng ka buh ruh ka jingmaham ba u DC um dei ban ai jingbit kulmar ban pynlong ïa ki jingïakob khwai doh hapoh ka distrik lada kim lah ban bud ïa ki kyndon namar ka thaw jingeh pynban ïa ki paidbah.
Ka HYC ka la kynthoh jur ruh ïa ka jingleh jong ki pulit kaba la paw ruh ha ki rynsan lad pathai, ha kaba la ïohi ba hadien ba kut noh jong katei ka jingïakob khwai ka don da kawei ka jingïathong kaba heh. Kaei ba na ka liang ka HYC ka ong ka long ba ka pynrem jur ïa ka jingïakhalai nusib hangto bad la ïohi ba ki don ki briew ka Sorkar kiba dei na ka tnad pulit bad ka ïohi ba ki don ha ka ‘uniform’ hynrei ki don bynta ban pule ‘slip’ na ka bynta ki nongjop, kane ka dei ka jingpynlehraiñ ïa ka tnad pulit.
U President ka Ri Khasi Sepngi Federation pat u la ong ba ka RKSF ka pynrem jur ïa katei ka jingjia ha kaba tang na ka daw ka jingpynsngewbha ïa ka doh da ki nongpynïaid bad kiba wan ha katei ka jingïakob khwai ka la wanrah jingeh pynban ïa ki paidbah ba ïaid ba ïeng khamtam ïa kiba pang ba shitom kat haduh ban da don ruh ka jingduh noh ka mynsiem ba kordor.
U la ong ruh ba ka RKSF ka dawa jur na ki bor distrik ba ki dei ban khot hajir bad pynshitom ïa kiba donkti ha katei ka jingpynïaid khwai dohkha. Ki la dawa ruh ba dei ban pynsangeh noh ïa kiba kum kitei ki jingpynïakob katba ym pat lah ban pynbeit.
Shuh shuh u la ong ba ka RKSF ka dawa ruh ba dei ban siew ïa ka bai lutksan sha katei ka longïing bad lada ki bor ba dei peit kim shim khia ïa katei ka kam kan leh da kaba tyngeh.
