Miami, Nailur:
Ha kane ka khubor, la ong ba ka la pynlyngngoh bad pynkyndit ia ki paidbah kiba iohi ia katei ka video kaba la saphriang ha ki Social Media hadien ba la iohi ia 2 ngut ki nongtrei jong ka tnat Transportation Security Administration (TSA), kiba khura bad lute ia ka pisa bad ki jingdon-jingem na ki pla jong ki paidbah hapoh jong ka Kad Liengsuiñ Miami International Airport.
La iathuh ba kitei ki heh pulit kiba dei khmih ha katei ka Kad Liengsuiñ, ki la ioh ban tuh haduh kumba $600 eiei ka pisa, ha ryngkat kiwei de ki tiar bad jingdon- jingem jong ki paidbah ha ka 29 tarik u Jylliew jong une u snem.
Ia kitei ki 2 ngut ki heh pulit, la ithuh kyrteng kum u Josue Gonzalez uba dang 20 snem ka rta bad u Labarrius Williams pat uba la don 33 snem ka rta. Bad la kem noh ia ki ha u Naitung hadien ba ki heh ka tnat wad bniah ki la ioh jingtip bad tohkit bniah ia ki halor katei ka jingkynnoh bad jingsaphriang jong katei ka jingleh kam beaiñ jongki hapoh jong ka kam.
Ha katei ka video, la iohi ia kitei ki heh pulit ba ki khura bad plied ia ki pla jong ki paidbah nongleit- nongwan kiba pyniaid ia ki pla jongki na katei ka jaka ‘X-ray Machine’ kumba ju dei ban leh ha man ki Kad Liengsuiñ.
Hynrei ha katei ka video pat, la iohi ia uwei na kitei ki pulit uba da khlong bad khura ia ka pla thep pisa ‘Wallet’ bad shim ruh ia ka pisa kaba don bad thep hapoh ka pla patlun jong u.
