Kenya, Nailur:
Ki pulit ka Kenya ha ka Sngi Thohdieng ki la ioh kem ia uwei u nong Poland hadien ba la lap ia ka jingdon kti jong u ha ki kam khaïi drok. Ki pulit ha kane ka jingjia ki la ioh kurup ruh ia ka pisa ha ryngkat u drok ‘Heroine’ uba shong dor kumba $22,000 na ka Kad Liengsuiñ ba kham paw jong ka nongbah Nairobi.
Ia utei u briew la ithuh kyrteng kum u Arkadiusz Stanislaw, uba la shah suba don kti ha katei ka kam khaïi drok bad uba la shah kem noh hashwa ba un kiew ha ka liengsuiñ ka ban mih na Hungary bad leit her sha Egypt lyngba jong ka Jomo Kenyatta International Airport.
La ong ba ki pulit hadien ba ki la ioh kem ia u, ki la rah noh ia u sha thanat katba dang pynkhreh bad pyn-ap ban ioh ialam ia u hakhmat ka iing kashari.
Ka Margaret Karanja, kaba long ka Director jong ka tnat Anti-Nartics ha Kenya, ka la maham ia baroh ki nongkhaïi droks ba lada kim ieh noh ia katei ka kam ba ki ju trei bad khaïi, ma ki ruh kin shah pynngat lut ha ki kyndon pynkheiñ aiñ ba la buh jong ka ri bad kin ioh ruh ia ki jing pynshitom kiba iadei katkum ki jingleh pynkheiñ aiñ ki jongki.
La ong ba ki ri sha ka thaiñ Mihngi jong ka Africa ki dei kiba ju kham sakhi bha ia ka jingjur ki kam khaïi droks bad ki ju pynpoi bad pyniaid ia u drok uba na ki thaiñ Middle East, sha ka phang Sepngi.
