Shillong, Nailur 17
Wat la u kyrtong ka UDP na Sohïong, Bah Synshar Lyngdoh u la jop haduh lai hajar tam ka vote ïa u kyrtong ka NPP, Bah Samlin Malngiang ha ka ilekshon MLA ba dang shu dep hynrei haduh mynta ym pat don ba nud wat tang uwei u nongkitkam ban pynpaw pyrthei ïalade ba kwah pan tiket na ka UDP ban ïakhun ïa ka ilekshon MDC na Sohïong-Nongspung konstitwensi ka ban long la shem snem (2024).
Haba pyrshang ban pynthikna ïa kane, u Bah Synshar Lyngdoh uba dei u MLA ba mynta na ka seng UDP na Sohïong u la ong ba haduh mynta ym pat don uwei ruh uba kwah ban ïakhun ïa ka ilekshon MDC.
Haba kylli la u Bah Amazing Kurbah uba ki paidbah ki ju sngewtynnad ha ka por ba ïalap ilekshon la un pan tiket ne em, u Bah Synshar u la ong ba u Bah Amazing u khlem pan tiket namar ka shnong jong u ka hap ha Mawphlang-Diengiei konstitwensi ha ka ilekshon MDC.
U Bah Synshar u la ïathuh ba un sa tip ïa kiba kwah pan tiket ynda la lum ïa ka jingïalang ban pynbna ba la donkam ban wad kyrtong na ka bynta ka ilekshon MDC.
Katkum ki khubor ba la ïoh lum la ïathuh ba lada ym don ba pan tiket ïa ka ilekshon MDC, ki nongkyrshan ki lah ban pynbor ïa u Bah Synshar Lyngdoh uba ju khot ieid Bah Pup ba un hap ban ïakhun hi ïa ka ilekshon ha u snem 2024.
Haduh mynta kiba la pynthikna ban ïakhun ïa ka ilekshon MDC na Sohïong-Nongspung konstitwensi ki long na ka NPP yn ïakhun biang u MDC ba mynta Bah Sherborlang Mawlong, na ka Congress lah ban ïakhun biang u Bah S. Osborne Kharjana, na ka UDP bad VPP kiba la pynthikna ban pynïeng kyrtong tangba ki dang ïa wad kyrtong haduh mynta.
Haba ïakren bad u Bah Amazing Kurbah ha kine ki sngi u la pynpaw ba un nym ïakhun ïa ka ilekshon MDC namar u dei tang u nongkyrshan jong ka seng UDP ban ai jingkren ha ki rynsan ïalap ilekshon.
