Naypyidaw, Nailur:
Katkum ki khubor la ong ba ka Myanmar ha kane ka kynti, ka la tyrwa ban sam ‘Visa’ sha ki nongleit- nongwan jong ka China bad India wat haduh ka por ba ki leit poi ha katei ka ri. Ia ka tarik ban pynsdang ia katei ka jingpyniaid na bynta shi snem, yn sa pynbna shen hadien ynda la dep ban pynbit-pynbiang bad shim ia ka rai ba khatduh.
Kumta, la ong ba kito kiba don ia katei ka ‘Visa’, kin lah ban leit rung sha baroh ki bynta jong ka ri lait noh tang ha kino- kino ki bynta ba la pyrkhing bad khang ia ki ban leit namar ka jingbym shngaiñ ne kaba ap jingma ia ka jingim jongki hi.
Ia mynta hi, ki paidbah nongshong shnong jong kine baroh ar ri (India & China), ki dang hap hi ban applai ia ka ‘Visa’ lyngba ka rukom ‘Online’ kumba ju leh man ka por, lane lyngba jong ka tnat sam ‘Visa’ jong ka Myanmar.
Watla katta, la ong ba ki katto- katne ki ri kynthup ia ka United States bad ka Australia, ki la maham ia ki nongleit- nongwan napoh ka ri bad kumjuh ruh ia kiba na kiwei pat ki ri, ba kin kiar shwa shipor na ka jingleit jingwan jongki sha Myanmar namar ka jingïakynad hapoh katei ka ri, kaba nang neh haduh kine ki sngi bad kaba long ruh ka jingma ia ka leit- ka wan jongki hapoh katei ka ri.
Kumjuh ruh la ong ba ka China bad ka India, kiba don markhap bad ka Myanmar, ki ju iakren bad iatrei lang ban ioh jingtip thik- pa thik halor ka jinglong- jingman hapoh jong katei ka ri naduh ba mih ka jingïakynad.
La ong ba ka Myanmar, ha u snem 2011, ka la sdang ban plie bad tyrwa ‘Visa’ biang sha ki nongleit- nongwan kiba na kiwei pat ki ri ba kin leit ban jngoh leit rung biang sha Myanmar hadien ki phew snem ba la synshar hi ia katei ka ri da ki shipai.
Ka Myanmar ka la khang khyrdep ruh ia ki khyrdop rung bad khyrdop mih jongka, naduh ba wan lynshop ka khlam Covid bad kumjuh ruh ki jingïakynad hapdeng ki shipai bad kiwei de ki jingjia- ia umsnam ki la pynlong ia ki paidbah nongjngoh kai na kiwei pat ki ri ba kin kiar bad salia ban leit ruh sha Myanmar namar ka jingbym shngaiñ jong ka jinglong- jingman ha katei ka ri.
Kumjuh ruh haba iadei pat bad ka ioh- ka kot ha katei ka ri, la ong ba wat ka dor jong ka pisa ha katei ka ri, ka la hiar noh bad ki la don ki jingpynlip bor ding bad jing pynshong dum ha kiba bun ki nongbah namar ka jinghiar ka ioh ka kot ba katei ka ri ka mad ha kine ki sngi.
