Sindh, Nailur:
Katkum ka kaiphod ba la ioh lum jingkheiñ tat haduh ka Sngi Saitjaiñ jong kane ka taiew ba la dep, la ong ba ka jingdon ki khynnah kiba khlad na ka jingpang ‘Malaria’ ka la kiew sha ka 6 ngut tang hapoh ka shi taiew. Kane ka long hadien ba katei ka jingpang ka la sdang ban pur stet bad khie jur ha ka thaiñ Sindh baroh kawei.
Dang shen ruh la ioh jingtip ba iwei i khyllung 11 bnai na ka shnong Samandar Khaso, i la ioh kem ia katei ka jingpang bad ia kane ka la tip hadien ba la leit rah ia i sha ka Jacobabad Hospital. Hynrei, la ong ba itei i khyllung ruh i la khlad noh namar ka jingslem palat ban ioh ia ki lad jingsumar na katei ka hospital.
Katkum ka kaiphod ba la ioh lum da ka tnat Sind Health department, la shem ba ki don haduh 2,69, 596 ngut kiba la ioh kem ia ka jingpang ‘Malaria’ hapoh ka thaiñ Sindh baroh kawei.
Naduh u Kyllalyngkot haduh Nailar jong une u snem, ki don 1,32, 441 ngut kiba ioh ia katei ka jingpang hapoh Hyderabad, ha ka jingshim jingkheiñ ia ka jingpur stet jong katei ka jingpang hapoh jong ki 8 bnai.
Katkum ki khubor, la ong ba ka Mirpur Khas division ka la don haduh 65,807 ngut kiba ioh ia katei ka jingpang kaba la saphriang bad pur stet na ka jingdait ki skaiñ pyrjong bad kumjuh ruh ka Larkana Division pat ka la don 48,499 ngut ki nongpang Malaria.
Katba ka jingdon jong kiba ioh kem ia katei ka jingpang ha ka Sukkur Division pat ka long 11, 591 ngut bad 4,924 ngut pat kiba ioh pang ha Shaheed Benazirabad Division.
Katba, ka Karachi Division pat ka la don 1,834 ngut kiba ioh kem ia katei ka jingpang hapoh jong kitei ki 8 bnai, khlem da don pat kiba khlad na katei ka jingpang.
La ong ba ka jingjur u slap bad ki jingshlei um hapoh jong katei ka thaiñ Sindh ha u snem ba la leit, ka la pynlong ia katei ka nongbah ba kan shah ktah jur ha katei ka jingpang ‘Malaria’ ha une u snem namar ka jingioh lad jong ka um ban lang bad neh naduh kitei ki por ka jingshlei um.
