Moscow, Nailur:
U nongialam jong ka North Korea, u Kim Jong Un, ha ka jingleit phai jong u na ka jingleit jurip sha Russia, u la ioh pdiang ia ki jing-ai sngewbha na ka Russia da ki ‘Drone’ ba la shna da ka Russia, kum shi bynta ban pynpaw ia ka jingsngewnguh bad ka long ruh kum ka jing-ai burom ia utei u nongialam ka North Korea halor ka jingkloi jong ka North Korea ban iarap bad ai jingkyrshan ia ka Russia ha kum kane ka por ba baroh kiwei pat ki ri ki ïeng pyrshah bad ki la pynsah marwei ia ka Russia namar ka jingleit hiar thma jongka ia ka Ukraine.
La ong ba u Kim u la ioh pdiang sngewbha ia 5 tylli ki drone ‘Kamikaze’ bad kawei ka drone ‘Geran-25’ ha katei ka sngi ba u mih na Russia ban leit phai noh sha ka ri jong u sha North Korea.
Katei ka jingleit jurip jong utei u nongialam ka North Korea sha Russia, ka long hadien ba ka Russia ka la pan jingkyrshan na katei ka ri bad kumjuh ruh na ka liang jong ka North Korea, ka la kular ban pynpoi ia ki tiar iakhun thma bad ki ‘namding kiba khlaiñ bor kiba ka la shna bad pynmih hi dalade.
