Shillong, Nailur 18
Ka AS Roma ka la khur ïa ka jingjop kaba nyngkong eh ha ka aïom ïalehkai 2023-24 hadien ba ka la lah ban pynliem noh ïa ka Empoli da 7-0 kol ha ka Serie A.
Da kane ka jingjop ka la kyntiew ïa kane ka kynhun hapoh ka jingïalam u Jose Mourinho na u laiñ jong ka jingma sha ka kyrdan ba 12 da kaba kamai 4 point na ki saw sien ïakhun.
Halor kane ka jingjop, u Jose Mourinho u la ong, “Ngi la lah ban ïalehkai bha, hynrei ngim pat ju lah ban khur jingjop haduh 7-0 kol. Ngi la ïakhun tyngeh kat haduh ban da khur ïa ka jingjop.”
Kane ka jingjop ka la long kum ka jingai mynsiem ïa ki rangïalehkai ka Roma, kiba la ïakhun tyngeh pyrshah ïa ka Empoli.
Tang mar ïasdang ka jingïalehkai, u Paulo Dybala u la ïoh ban pynkhih jar tang mar ïasdang ka jingïalehkai lyngba ka penalty ha ka minit kaba ar. Hadien hynriew minit kane ka kynhun ka la pynbud biang ïa ka kol kaba ar lyngba u Renato Sanches.
Hadien shiteng kynta ka Roma ka la ïoh ei shi kol na ka daw ka jingbakla thep hi u rangïalehkai ka Empoli u Alberto Grassi ha ka minit kaba 35 na ka bynta ban tam da 3-0 kol ha ka kylla step.
Hadien ba la bteng biang ïa ka jingïakhun jong ka kylla miet, u Dybala u la pynbud biang ïa ka kol kaba ar ka jong u ha ka minit kaba 55 lyngba ka corner.
Katei ka kynhun u Mourinho ka la thep biang ïa ka kol kaba san lyngba u Bryan Cristante ha ka minit kaba 79. U Romelu Lukaku u la lah ban pynurlong ïa ka kol kaba nyngkong eh na kane ka klob kaba thymmai ha ka minit kaba 82 bad ïa ka kol kaba khatduh la thep da u kapten u Gianluca Mancini hadien ka jingïarap pynbuh bol da u Cristante na ka bynta ban khur syndon ïa ka jingjop.
