Shillong, Nailur 18
Ka Meghalaya Athletics Association (MAA) ha ryngkat ka jingkyrshan lang ka tnat ïalehkai jong ka Sorkar Pdeng, ka la pynlong ïa ka Khelo India Women’s Athletics League ha ka Lah Sngi U Blei ha kaba la wan ïashim bynta da 37 ngut ki ‘thei ïalehkai Athletics na kylleng ki district jong ka Jylla.
Ha kane ka sngi kitei ki ‘thei ïalehkai ki la ïoh ban iashim bynta ha ka jingïakob mareh ba la tip kum ka 3k bad 5k Road Run ha ka jingdon lang ka Kong Bansara Dhar (International Archer) bad kaba long ka Archery coach hapoh ka tnat ïalehkai kum ka kongsan kaba la plie ïa kane ka jingïakob.
Ha kane ka sngi la don lang ruh u Bah Finely Pariat, Secretary ka Meghalaya Athletics Association, Bah D. Ryntathiang, Joint Secretary ka MAA bad u Pleasantly Synnah (Athletics coach).
Ha ka jingïakob mareh kaba 5km, la jop da ka Barisha Khyndait, ba-ar ka Melibad Kro bad ïa ka kyrdan balai la ïoh da ka Medaroi Biam. Katba ha ka jingïakob mareh kaba 3km la jop da ka Betlyne Grace Makri, ba-ar la ïoh da ka Barihun Kharjahrin bad ïa ka kyrdan balai la ïoh da ka Anrisha Klein.
Ïa kane ka Khelo India Women’s Athletics League la pynlong ha ki 23 tylli ki jylla ha la ki jong ki tarik ba la pynbeit da ka tnat ïalehkai kiba kynthup ha nongbah Delhi, Haryana (Karnal), Tamil Nadu Chennai), Kerala (Ernakulam), Maha-rashtra (Mumbai), Goa, Telangana (Warangal), Andhra Pradesh (Guntur), Uttarakhand (Deh-radun), Uttar Pradesh (Lucknow), Madhya Pradesh (Bhopal), Chhattis-garh (Bilaspur), Chandigarh (Chan-digarh), Punjab (Sangrur), Jammu & Kashmir (Jammu), Hima-chal Pradesh (Dharamsala), Nagaland (Dimapur), Guja-rat (Vadodra), Rajasthan (Jaipur), Bihar (Patna), Odisha (Bhubanesh-war), West Bengal (Kolkata) bad ha Megha-laya (Shillong).
Kane ka Khelo India Women Athletics League kan kyntiew ïa ki nongïashim bynta jong ki kynthei ha ka kam ïalehkai da kaba pyndonkam ïa ki kum ka rynsan ban ithuh ïa ki sap ïalehkai ba kyrpang jong ki. Kan long ruh ka jingplie lad ïa ki kynthei ba kin ïoh ban ïashim bynta ha ki lympung bapher bapher ha la ki jong ki kyrdan ïalehkai ha kylleng jong ka ri.
Ka thong jong kane ka Khelo India Women’s leagues kam mut tang ban pynkhlaiñ ïa ki lympung ïalehkai hapoh ka ri bad ban ithuh ïa ki sap ïalehkai, hynrei ban kyntiew ïa ki ‘thei ïalehkai khnang ban saiñ dur ïa ka lawei ka jong ki.
