Ka Liang Pyrshah lane ‘Opposition’ ha Ïingdorbar Thawaiñ ka jylla ka don tang 14 ngut ki MLA, kata, mar san ngut na ka Congress bad All India Trinamool Congress (AITC) bad saw ngut na ka Voice of the People Party (VPP). Ki la don artylli ki Dorbar ki MLA naduh ba la dep ka ilekshon ha u Lber mynta u snem. Hynrei kaei kaba ngi ïohi ka long ba kine ki seng ha ka Liang Pyrshah ki duna bha ka jingïatylli hapdeng jong ki. U don u nongïalam ka Liang Pyrshah, hynrei kine ki lai tylli ki seng kim don lang ha kawei ka shatri. Ki don la ka jong ka jong. Ngi tip ba ha ka por ilekshon, kine ki lai tylli ki seng ki la ïakhun la ka jong ka jong, hynrei hadien ba la kut ka ilekshon, ki la dei ban don ka jingïatreilang hapoh ka Ïingdorbar Thawaiñ khnang ba ka Liang Pyrshah kan kham khlaiñ.
Ha ka sngi sdang jong ka Dorbar Synrai ha ka 15 tarik Nailur, u Symbud Myntri Rangbah uba peit ïa ka tnat Parliamentary Affairs, u Bah Prestone Tynsong, u la kyntu ïa ki seng Liang Pyrshah ha Ïingdorbar Thawaiñ ba kin da ïatai bad don ka jingpynbeit lypa para maki haba wanrah ïa ki mat ha kane ka Dorbar Synrai namar lada ki dkhot ka Ïingdorbar ki wanrah ïa ki mat kiba long kumjuh, ka shu pynlut kai ka por bad duh noh ban ïatai ïa kiwei pat ki mat kiba donkam. U Bah Prestone u la ong ba u kyntu ïa ki dkhot kiba don sha ka Liang Pyrshah ba haba ki phah ïa ki mat kiba dei ban ïatai ha Ïingdorbar ka bha eh ba kin da shong lang para maki ban ïakren. Une u Symbud Myntri Rangbah u la ong ba la ïohi ba man ka por la ka dei ki jingkylli ne ki mat ïatai lyngba ka, Motion, Resolution, Special Motion, Zero Hour Notice ki shu kut noh kumto namarba uwei u dkhot ka Ïingdorbar wanrah kawei ka mat, bad na ka liang ka Sorkar ka la jubab, bad sa uwei biang u dkhot u wanrah kajuh ka mat, bad kumne ka shu lut ei ka por. Hynrei u la ong ba lada don ka jingïakren bad pynbeit lypa shwa ka por ban wanrah ïa ki mat, bad na ka liang ka shlem treikam u Lamphang ruh ka lah ban pynbeit ïa ka por. Wat ki mat ïatai kum ka Motion kaba donkam ruh ki shu kut noh bad ym poi shuh ban ïatai ïa kiwei pat ki mat kiba donkam kiba la buh ban ïatai ha ka sngi shong dorbar.
Kane ka jingkren jong u Bah Prestone kam long kaba bakla. Ha ka jingshisha, ka Liang Pyrshah ka dei ban ai khublei ïa u Bah Prestone namar u la ai ïa ka jingmut kaba dei eh bad kin hap ban shim bad ban pyntreikam ïa ka lada ki kwah ba ki jingïatai ha Ïingdorbar kin long kiba shongnia bad shongkun. Ngi ïohi ha ka Ïingdorbar Thawaiñ kaba la leit noh. Ki MLA Congress ki la long kawei bad ki jingïatai ki long shisha kiba shongkun bad kiba pynïeng shkor ïa ka sorkar. Ka jylla ka don ïa ka sorkar kaba khlaiñ bad haba ka long mynta, ka Liang Pyrshah ka dei ban kham khlaiñ lym kumta ka sorkar kan leh katba ka sngewbit ha ka synshar ka khadar ka ban buh jingeh ïa ki paidbah. Ngi ïohi mynta ba kumba 26 tylli ki seng saiñpyrthei ha ka ri kiba don ha ka Liang Pyrshah ki la wan lang ban thaw ïa ka kynhun synrop I.N.D.I.A ban ïakhun pyrshah ïa ka BJP bad ka N.D.A ha ka ilekshon MP Lok Sabha ka ban long ha u snem ban wan. Lehse ka Congress, AITC bad VPP ki la dei ban shim nuksa na ka I.N.D.I.A ban ïatreilang hapoh ka Ïingdorbar wat lada ki kwah ban ïakhun la ka jong ha ka ilekshon.
Ha ka saiñpyrthei, ki don ki khep ba yn hap ban ïa klet noh shwa ïa ka jingsngew seng bad ban wan lang ha kajuh ka rynsan na ka bynta ka bha ka miat ki paidbah. Ki ju don ki aïom bad ki ïa ba ka banse ka wanrah ïa ka jingïatylli. Baroh ngi angnud ban ïohi ïa ki jingïatai kiba shongkun bad shongnia ha Ïingdorbar, bad kane kan urlong lada ka don ka jingïasngewthuh jingmut hapdeng ki seng kiba shong ha ka Liang Pyrshah. Ka jingïasngewthuh jingmut kan nang pynkhlaiñ ïa ka rukom ïatai ka ban pynhun bad ai jingmyntoi ïa ki paidbah. Kan don jingmut aïu lada ïakren ha Dorbar hynrei ka bym ai jingmyntoi pat ïa ki nongshong shnong? Namarkata, ngi sngewdei ban kyntu ïa ki seng ha ka Liang Pyrshah ban ïasngewthuh jingmut para ma ki khnang ba kan wanrah jingmyntoi ïa kiba bun.
