Bertina Lyngdoh
Ka bamsap ka dei kata ka jingbamduh ïa ka pisa pilain ka bhah ka hok ne ki jingmyntoi u paidbah. Ka pisa ka dei kawei kaba pynpisa ïa ka mynsiem, kaba pynsngewbha, kaba pynïashun, bad don lei ha kaba ka hikai bha bad hikai sniew. Ka don ruh ïa ka bor ban pynbha ne pynsniew bad namar kane, ka don ka jingong kaba ong ba ka pisa ka long kum ka jinghikai bamsap. Haba ka hikai ïa ka ba bha, ka hikai iangi kum ha ka jingseng-kam seng jam, ka jingïarap ïa kiba duk, ka jingïarap ïa kiba pang ba shitom, ka jingailad bad kyrshan ïa ka ban ïeng ha la ki kjat ki kti, bad kiwei kiwei. Haba ïa dei bad ka jingsniew pat, ka long pynban ka jingpynïasniew para briew, ka jingpynduhnoh ia ka jingshaniah para briew, ka jingkhaïi ïa ka bam ka dih ne ki kynja mar ba sniew, ka jingpynïaid iaki khaïi ka pateng ba sniew, bad kumta ter-ter. Kine baroh ki dei ka jinglong jingman ba sniew ka bamsap.
Ka bamsap barabor ka ju dei na ki baheh bahaiñ, kum ki nongbat kam, bad kiba bat ïa u lakam synshar. Ka lad ai jingïarap ban ioh myntoi u paidbah ki don, hynrei namar ka bamsap, kiba bun ki nongioh myntoi ki duh noh ïa ka. Kine ki jingeh bunsien la ju ïakynduh bha da u rit u ria, khamtam u bym shlan ban khynra ïa ki hok ka jingioh myntoi jong ki. Bun ki jingioh myntoi kiba shu jah klep, bad duna bha ha ka rukom pyntreikam ïa ki khlem tip shano bad shaei ki jah. Ki don pat ki jing-iohmyntoi ha kaba u paidbah ne ki nongioh myntoi kim tip ba ki don kum kita ki lad ïaki. Don pat ki por, ha kaba kiba dei peit ïa kum kita ki lad jingïarap jingmyntoi, kim don ïa ka jingtip ba ki don kita ki lad jingmyntoi ba u paitbah u dei hok ban ioh katba u la shah pynbad ha u ïa kata ka kyrdan. Kine ki long ki katto katne ki jingeh ka ba u nongioh myntoi u ïa ïakynduh bad dei namar kane basa don ka kynnoh bamsap. Haba ka bamsap ka synshar ïa u briew, baroh ki jingmyntoi kaba dei hok ban ioh ki la shu jah klep noh bad dei hangne ba bun ki long noh kita kiba khlem jam khlem jam khamtam haba ka lad seng kam seng jam ne ki lad kamai khlem shim la pyntreikam bha ïa ki. Lah lehse ban ong ba namar ka jingdon ka bamsap bad jingkhlaiñbor jong ka, ka khaïi ka pateng ruh ka la hiran bad duna bha. Lada kum kine ki lad kim shim la pyntreikam bha na ki ophis treikam bha u nongioh myntoi u duh noh ïa ka. Kum ka lad ka pule puthi kam don ne lada ka don ruh ki nongioh myntoi kim ioh ïa ka, kane ka pynhiar noh ïa ka jingnang jingstad ka ri kumjuh ruh ka jylla. U ban jynjar bha lada kine ki lad jingmyntoi kim shim la treikam bha u dei u ba duk ba rangli. Kum ki lad ne ki skim shna ïing bad kumjuh ruh ka rep ka riang ym shim la ai sha uba dei hok ban ioh kumta u bapli u kut noh ha i ïing trep ne bam jhur iew jhur hat. Kumjuh ruh lada kum ka lad jingïarap haba ïadei bad ka koit ka khiah u nong-iohmyntoi um ioh, u bapli u kut noh ha ka jingbahram na ka bynta ka dawai dashin ne ban ioh ïa ka jingsumar. Hooid, ym tang ha ka ri jong ngi ba ka bamsap ka don hynrei ha kylleng bad kane baroh ka dei namar ka bad jingkhlaiñbor ka pisa. Hynrei la katta ruh, ka pisa kam dei ban lah khamtam sha ka jingsniew u paidbah.
Namarkata, la dei ïa tnat ophis treikam ban pynthikna ba ïa ki lad jingmyntoi la pynbna sha kiba dei hok ban ioh. Kum ki nongioh myntoi, to shlan to shlur la ka hok ka sot ki lad jingïarap ban ioh myntoi.Long kiba smat bad stad pyrkhat ba kino kita ki lad jingmyntoi ba phi dei hok ban ioh. Wat ai lad ba kiwei kin pyndonkam ne pynsyrwa lane pyndonkam bakla ïa ki lad jingmyntoi jong ngi khamtam da kaba ki pyndonkam bakla noh ïa ki kam shimet jong ki. Pynbna bad ai jingtip sha kito kiba dei hok ban ioh ïa ki lad jingmyntoi. To ngin long kita ki ban weng ne pynduhnoh ïa ka jingbamsap ba ka hok jong ngi ngin ioh pura.
