Tehran, Nailur:
ki paidbah nongïakhih hapoh Iran, ki la iathuh ba ki bor pyniaid ka Iran ha ka Sngi Saitjaiñ ki la khang pyrshah ia ki bahaiing- hasem ban leh burom ne kynmaw burom ia ka jingkhlad ka samla Mahsa Amini ha ka jingdap shi snem ka jingiap jong ka ha katei ka sngi, ha kaba ki bor pyniaid ki la kem bad bat noh pynban ia u kpa jong katei ka samla wat hapdeng ka jingpyrshah jong ki paidbah ha katei ka jaka.
ka Amini, ka long ka samla nong Kurd na Iran bad kaba la khlad noh ha ka rta kaba 22 snem hapdeng ka jingtohkit jong ki pulit hadien ba la rah ia ka sha thanat namar ka jingbym bud ia ki rukom riam tynrai jong katei ka ri kumba la buh da ki bor pyniaid. Ki bahaiing jong ka Amini ki iathuh ba katei ka samla ka khlad namar ka jingshah tied- shah shoh na ki bynta jong ka khlieh. Hynrei na ka liang ki pulit bad ki bor pyniaid katei ka ri, ki la kyntait halor katei ka jingkynnoh bad ong ba ka Amini ka la khlad noh hadien ba ka la kyllon bad kem pang hi dalade hapdeng ka jingshah tohkit ha ki pulit ha katei ka jingjia.
Kumta, la ong ba ka la mih ka jingiakhih paidbah kaba jur bah hapoh Iran ha u snem ba la leit hadien ka jingkhlad jong ka Amini bad da ki spah ngut ruh ki paidbah kiba la khlad hapdeng ka jingiakhih bad jingïakynad bad ki pulit. Kumjuh ruh da ki hajar ngut kiba la shah kem bad ki bym pat shah pyllait wat haduh kine ki sngi ba mynta.
Shuh shuh ruh la ong ba ha katei ka Sngi Saitjaiñ pat, katba ki bahaiing- hasem jong katei ka samla ki dang pynkhreh ban leh burom bad kynmaw burom ia ka jingdap shi snem ka jingiap jongka, ki bor pyniaid katei ka nongbah ki la leit ban kem noh ia u kpa jong katei ka samla- u Amjad, napoh ka iingsah jongki ha ka shnong Saqez kaba don sha ka phang West jong katei ka nongbah. Hadien kata, ki bor pyniaid ki la pyllait biang noh ia u kpa jong katei ka samla bad ki la maham pat ba kim dei shuh ban leit pynlong jingleh burom eiei ha u lum jingtep jong ka Amini lada ki kwah ban lait na ki jingjia ba sngewsih.
Hynrei la bna khubor pat ruh ba ki bor bor pahara jong katei ka ri, ki la thmu wat ban shu pyniap klep noh ia u kpa jong katei ka samla ha ki khyndiat por ba la leit.
U Amjad Amini u la shah khot iakren ha ki heh ka tnat wad bniah ha ka taiew ba la leit, hadien ba la bna ia ka jingthmu jong ka iing katei ka samla ban pynlong jingleh burom ia ka jingdap shi snem ka sngi iap jongka ha katei ka taiew.
