Barcelos, Nailur:
Katkum ki khubor la iathuh ba 14 ngut ki briew ki la duh ïa ka jingim ha ka Sngi Saitjaiñ hadien ka jingleit hap bakla jong kawei ka liengsuiñ ha ka khlaw Amazon jong ka Brazil katba ka dang pyrshang ban hiar khyndew kyrkieh noh namar ka jingsniew jong ka suiñ bneng ha katei ka sngi. La ong ba katei ka liengsuiñ ka thmu ban leit hiar ha ka shnong Barcelos ba ju leit bha ki ‘riew shangkai pyrthei hynrei ha katei ka jingkum bakla, ka la leit hap pynban sha katei ka jaka ka bym long, ha kaba ym don shuh wat tang uwei ruh ban lait im na katei ka jingjia.
Katei ka liengsuiñ rit, la ong ba ha katei ka sngi ka la shu hiar antad khlem da lah shuh ban iohi ia ka jinglong- jingman jong ka jaka ba shapoh khyndew namar ka jingjur jong u slap ha katei ka sngi bad dei na kane ka daw ruh ba katei ka liengsuiñ ka la hap ban hiar noh shiteng lynti napdeng ka jingthmu jongka ban leit sha kawei pat ka jaka.
Napdeng baroh 14 ngut kiba khlad, 12 ngut ki dei ki riew paidbah lane ki pasenjar kiba shong hapoh jong katei ka liengsuiñ. Katba ki 2 ngut pat ki dei ki nongpynïaid bad nongñiah jong katei ka liengsuiñ.
Ki kynhun wad bniah ki iathuh ba baroh 12 ngut kitei kiba khlad, ki dei ki shynrang bad kiba dang thmu ban leit khwai paralok shi kynhun bad ki dei hi ki nong Brazil.
U Lat katei ka nongbah, u Wilson Lima u la phah ia ka kyrwoh sngewlem sha ka iing- ka sem jong kitei kiba khlad baroh.
Katkum ki dur ba la pyn saphriang da ki lad pathai khubor, la iohi ia katei ka liengsuiñ rit kaba rong lieh bad kaba la julor bun na ki bynta ba sha khmat.
Katei ka liengsuiñ ka dei ka EMB-110, ba la shna bad pynmih hi da ka kompeni shna liengsuiñ jong ka Brazil bad la ong ba katei ka liengsuiñ ka dang thmu ban leit sha Barcelos hadien ka jingmih jongka na Manaus ha katei ka sngi.
Shuh shuh ruh ki heh jong ka tnat liengsuiñ ki iathuh ba ki don sa 2 tylli kiwei pat ki liengsuiñ rit kiba thmu ban leit sha Barcelos ha katei ka sngi, hynrei ki la wan phai biang noh namar ka jingsniew palat jong ka suiñ bneng.
Haba iadei bad kane, la ong ba ki pulit jong ka tnat liengsuiñ ka Brazil kin sa leit ban peit thuh bad wad bniah ruh halor ka daw jong ka jinghap jong katei ka liengsuiñ ha katei ka jingjia bad dang don shibun tylli ki jingbym shai kiba dang donkam ban ioh jingtip halor katei ka jingjia ha katei ka sngi.
