Shillong, Nailur 18
Hadien ba la lah ban pynkut noh ïa ka U-19 Girls Inter District Cricket, ka Meghalaya Cricket Association ka la sdang sa ka lympung ïalehkai ki shynrang ïa kaba la tip kum ka U-19 Boys Inter District Cricket Tournament ha ka Lah Sngi U Blei.
Ha kane ka sngi sdang ïa kane ka lympung, ka Shillong Cricket Association-A bad ka East Garo Hills District Cricket Association ki la khur ïa ka jingjop hadien ba ki la lah ban pynliem noh ïa ka SCA-B bad ka South Garo Hills DCA da mar 8 wiket.
Ha ka jingïalehkai kaba la long ha madan Umbuda kaba ha Nongpoh, ka SCA-B ka la shimti shwa ban tied nyngkong ha kaba ka la shah pynhap nyngkong haduh 3 wiket bad ïoh 81 run. U Shubham Rasaily (22), Manthan Dey (19) and Josiah Wanñiang (14) ki la lah ban kamai run.
Lyngba ka jingshah pynhap wiket u Josiah ha u Charm Marbaniang ka la pynlong ïa katei ka kynhun ban shah pynhap wiket iwei hadien iwei ha kaba ka SCA-B ka la shah pynkhyllem haduh 8 wiket na ka bynta ban kamai 94 run ha ki 16.1 over. U Charm u la lah ban khur 6 wiket bad u la ïohpdiang ïa ka nam Player of the Match.
Haba wan shimti ïa ka pali kaba ar, ka SCA-A ka la lah ban kynjoh sha ka thong. U Kshitij Singhania u la jan khyrwit ïa ka shiteng spah run kaba 49 run (3x4s, 4x6s) na ki 35 bol. U Pushkar Raj, u la shah pynkhyllem noh hadien ba u la tied 24 run na ki 18 bol. Ki ne ar ngut ki la lah ban pynurlong ban ïakamai lang 64 run na ka bynta ka wiket kaba nyngkong.
Haba phai sha kawei pat ka jingïakhun, ka South Garo Hills ka la jop ïa ka kynting pisa ha kaba ka la kamai 56 run ha ki 12.3 over. Ym don na ki nongtied kiba lah ban kamai bun run. Katba ki nongkawang bol ka EGH kiba la lah ban pynhap wiket ki long u Paisal Ali (3/5), Aristo R Marak (2/9), Gulgul Sangma (2/17) bad u Bilgrak G Sangma (2/19).
Haba wan shimti ïa ka pali kaba ar, ka EGH ka la lah ban kynjoh sha ka thong hadien ba u Lensbirth N. Marak (25 not out) bad u Aristo (12 not out) ki la lah ban ïalehkai ban ïatied lang 45 run. U Paisal u la khur ïa ka nam Player of the Match.
