Toronto, Nailur:
Ka India ha kane ka kynti, ka la pynrem jur halor ka jingshah leh ibeiñ jong u khynnah pule nong India hapoh Canada ha ki khyndiat por ba la leit. Utei u khynnah skul u dei u na ka jaitbynriew Sikh bad u la don 17 snem ka rta bad u long ruh u khynnah pule jong kawei ka skul hapoh British Columbia jong ka ri Canada bad kumta ruh ka India ka la kyntu ia ki bor pyniaid jong katei ka nongbah ba kin wad bniah halor kaba iadei bad katei ka jingjia bad ban pynshitom ruh ia kitei kiwei pat kiba leh ibeiñ ia ki jaitbynriew ba nabar.
Kane ka la jia ha ka 11 tarik u Nailur jong une u snem 2023, ha kaba utei u khynnah Sikh u la shah pyni bor ha kitei kiwei pat ki jaitbynriew katba u dang leit phai sha la iing na ka skul jong u ha Kelowna.
Ka tnat pulit Royal Canadian Mounted Police (RCMP) jong ka Kelowna ka la iathuh ba katei ka jingjia ka la jia ha ka por kumba 4 baje ha ka jaka sangeh bos kaba don ha ka surok Rutland Road bad Robson Road jong ka nongbah Okanagan.
Kumta, ka tnat kam bar ri jong ka India ka la pynrem jur ia katei ka jingjia bad ka la bthah ruh ia ki bor pyniaid jong katei ka ri ba ki dei ban wad bniah ia kaei kaba la jia baroh bad ba ki dei ban pynshitom ia kitei kiba don kti baroh khnang ba kum kine kiei- kiei kin ym wan jia shuh ha ki por ki ban wan.
Ha ka 13 tarik jong une hi u Nailur, ka tnat pulit RCMP jong ka Kelowna ka la ioh kem noh ia uwei u samla khynnah halor ka jingsdang bad jinglam khmat haba iadei bad katei ka jingleh ibeiñ jaitbynriew bad ban pynlehraiñ ruh ia utei u khynnah Sikh ha katei ka jingjia.
Kumjuh ruh na ka liang jong ka seng World Sikh Organisation of Canada, ka la dawa ba ki bor pyniaid ka Canada ki dei ban pynduh-pyndam ia kum kitei ki jingjia ibeiñ jaitbynriew bad katei ka seng ka la iathuh ruh ba wat da utei u khynnah samla ruh um don jingtip eiei ba na kaei ka daw kaba la pynlong ia u ba un shah leh ibeiñ kumtei ha katei ka sngi.
Shuh shuh ruh la ong ba namar utei u khynnah u dei uba dang shu leit sah shen sha katei ka nongbah, bad kumta um nud shuh ban leit phai biang sha ka jaka pule ha Rutland Senior Secondary School ha kaba u pule bad um treh shuh ruh ban leit- ban wan da ki kali paidbah lane ki bos paidbah.
Ka heh jong ka nongbah Kelowna, ka Mohini Singh ka la iathuh ruh ba utei u khynnah u dang shu leit poi dang kumba 5 bnai eiei hapoh jong katei ka nongbah bad kumta ruh um pat da lah bha ban kren ia ka ktien phareng ‘English’ bad u dang long teh-teh.
Nalor jong kitei kiei kiei baroh, la ong ba utei u khynnah u long uba smat ban leit sha skul bad ki nonghikai ruh ki sngewtynnad ia ka jingkloi jong u ban iatrei lang hapoh klas.
