Shillong, Nailur 19
U rangïalehkai ‘dien ka Manchester United u Aaron Wan-Bissaka un duh ïalehkai kumba katto katne por hadien ba u la ngat jingmynsaw ha ka jingïakhun kaba la shah rem da 3-1 kol ha la ïing ha ka Brighton & Hove Albion ha ka sngi Saitjaiñ, la pynpaw kane ka klob Premier League ha ka lah sngi U Blei.
“Utei u rangïalehkai un duh ïalehkai kumba katto katne taiew”, la bynrap ka United.
Kat kum ki khubor la ong ba utei u rangïalehkai ka England uba la mih madan ha ka minit kaba 85 ha ka sngi Saitjaiñ, un duh ïalehkai na ka bynta ar bnai na ka daw ka jingmynsaw (hamstring injury).
Kane ka jingmynsaw u Wan-Bissaka ka la nangbun kiba kiew ka jingmynsaw ki rangïalehkai ha ka United, ha kaba u rangïalehkai shapdeng u Mason Mount bad ki ar ngut ki rangïalehkai ‘dien kata u Luke Shaw bad u Raphael Varane ki la ngat ha ka jingmynsaw ha kine ki taiew ba la lah.
Hapdeng kine ki jingeh, ka United kan leit sha Bayern Munich na ka bynta jingïalehkai kaba nyngkong jong ka Group-A ha ka Champions League ka ban long ha ka sngi Balang, hashwa ba kan leit sha Burnley na ka bynta ka Premier League ka ban long ha ka sngi Saitjaiñ.
