Shillong, Nailur 19
Ka Meghalaya Professional Boxing Council (MPBC) ka la pynkup burom ïa u ‘rangïakura ka Jylla u Shanborlang Marbaniang uba la lah ban pynpaw ïa ka jingtbit ha ka rynsan ïakura jong ka United Professional Boxing ba la pynlong da ka Indian Boxing Council.
Ïa kane ka jingpynkup burom la pynlong ha ka Sngi Ba-ar ha Upper Shillong Boxing Hall kaba ha Nongkseh rim ha ka jingïadon lang u Finance Secretary ka KSU Upper Shillong bad uba long ruh u Asst. Organising Secretary ka KSU Sengkmie u samla Hopefulborn L. Mawnai kum u kongsan, u samla Shngaiñlang Sohkhlet, President KSU Upper Shillong, ha ryngkat ka jingïadon lang ki nongïalam ka MPBC ba kynthup ïa u Bah Ricky Copper Pathaw (President), Phrangbhalang L. Mawnai (Working President), Kampherki Thangkhiew (General Secretary), Franky Momin (Working Secretary), Kerdorlang L. Mawnai (Publicity Secretary), Ïai-donlang Rumnong (Treasurer), Reynold Nongsiej (Vice President), kiba haïing hasem jong kitei ki ‘rangïakura bad kiwei.
Na ka liang kitei ki nongïalam ka seng KSU lem bad ki nongïalam ka MPBC ki la pynpaw ka jingsngewkmen halor ka jinglah ban ïalehkai bha u Shanborlang ha katei ka rynsan ïakura kaba la long ha ka Sngi Saitjaiñ ha nongbah Delhi.
Ha katei ka jingïakhun, utei u ‘rangïakura ka Jylla u la lah ban pynïakhaid (draw) pyrshah ïa u Adil Rajesh Kumar Singh na Maharashtra ha ka kyrdan ïakura jong ka Super Flyweight 52kg.
U Adil Rajesh u dei u ‘rangïakura uba la bat ïa ka kyrdan basaw hapoh India ha ka Bantamweight, katba u Shanborlang u dei uba la bat ïa ka kyrdan ba nyngkong ha ka Super Flyweight.
Dangshen ha ka sngi rakhe ïa ka laitluid ka ri India kaba 76 ha ka 15 tarik u Nailar mynta u snem, u Shanbor u la lah ban pynliem ïa u Prasad Katnoor ha ka Super Fly Weight 52kg.
Une u ’rangïakura u dei u khun jong ka Kong Siplinda Marbaniang ba shong ba sah ha Pdengshnong, Umlyngka Upper Shillong.
Kumba ka paw kane ka long ka sien ba san kaba u la kiew rynsan ha ka Professional Boxing naduh ba u la khur jingjop ha ka Marine Pro Boxing Promotion ha u snem 2022 kaba la long ha Mumbai, katba u la ïakhaid pat lai sien ha ka Professional Boxing kaba la long ha u snem 2022 bad 2023 ha Manipur.
Te kumta ki la kyntu bad ai mynsiem ïa u lem bad kiwei ki ‘rangïakura ba kin nangïai trei shitom khnang ba kin nanglah ban nangkiew shaphrang ha ki kam ïalehkai jong ki bad ruh ba kin ïoh ban kheit ïa u soh ka jingjop.
Shuh shuh u Shanborlang Marbaniang ryngkat u Ïarapborsing Kharbani bad u Elbin Rani kin leit ïashim bynta sa sha Gujarat ha kaba ki la mih na kane ka nongbah ha ka sngi Balang.
U Shanbor un ïakhun pyrshah ïa u Madan Pratap uba na Visakha-patnam, Andhra Pradesh ha ka Flyweight, katba u Ïarapborsing un ïakhun pyrshah ïa u Devavath Anil Kumar uba na Hyderabad ha ka kyrdan ïakura jong ka Bantam-weight 53.5kg bad u Elbin Rani un ïakhun pyrshah ïa u Saleem Khan uba na Jammu & Kashmir ha ka kyrdan ïakura jong ka Featherweight 57kg. Kine baroh lai ngut kin kiew rynsan ha ka 24 tarik mynta u bnai.
