Bertina Lyngdoh
Na jingiohthiah ïanga phi kyrsiew, ba dang step phyrngap nga kyndit wei briew, ban sngap ïaphi te ngam ju ngiah, wat la nga dang don ha la jingthiah. Man ka step ïaphi nga ïai ap, ba phin kyrsiew bad long ka dak ka shin ka jingkyrmen ïanga.
Phi dei i jingthaw baim bad im hapneh ka meimariang, bad ba ki sur rwai jong phi ki long ka bok ka jingkyrmen ka sngi jongngi. Phi don ki thapniang ban her kylleng, la katta ruh phim ju sngewpher. Ki sner ki thapniang ha ka met jong phi ki don ïa ki rong ki bakhring ïa ka jingmut jingpyrkhat u briew. Tang dum ka sngi sha la skum phi her kumne ka jingim jong phi kam ju pher, phi im palei bad khlem jingkhuslai wat la phi long i barit hakhmat kiwei ki jingthaw baim ka meimariang kumjuh ruh napdeng ki sim barit.
I barit te phi long, hynrei phi heh pat ha ka jing-kmen. Man ki sur kiba phi rwai, ki ïathuh ba ka jing-kmen ka dei ka dawai bah ia ka jingkhuslai ki jingjynjar ne ki jingshem. Ki sur pah jong phi, ha man ka step phyrngap, ka pynkynmaw ïangi ba kum ki briew ngi dei ban ïaleh kumno ban pynkmen ïalade wat la ngi don hapdeng shibun ki jingeh.
Haba don ka jingkmen, ngi khiah ha ka mynsiem wat la ngim don ka pisa tyngka lane kata ka spah pyrthei. Ki sur pah ki sim barit mar ia sdang mih ka sngi, ki long kum kata, ka jingkitbok kitrwiang ïa ka sngi jongngi kata baroh shisngi. Na ki sur rwai jong ki, lah ban sngewthuh ba ki sim kim don ka jingkhuslai kumba briew u don shibun ki daw ka jingkhuslai. Lada kine ki sim ki ïai rwai khlem thait bad ba ka sur thiang jong ki ka pynpaw ba barabor ki don ïa ka jingkmen ha ki bad dei kane keiñ kaba pynkylli ïangi pat u briew ba balei mangi ngim don ka jingkmen la ngi la trei shitom, ne don ka spah pyrthei. Ka lad ka kham bun ïa u briew katba ka jingkmen pat ka don ha ki sim ki doh. Kumta, da ka jingkmen kaba ki sim barit ki don, ki ai ka jinghikai ïangi ba katba long hynrei kaba nyngkong eh kaba ngi dei ban don ka dei ka jingkmen.
Namarkata, wat la marwei phi don, ha tnat dieng ym don jingsngewsih ne jingkhuslai ei ei bad ba phim ju ïam hynrei phi iai rwai khlem thait. Ki sur rwai jong phi la haba slap ne rang, ki long ka jingkmen bymjukut kaba pynpalei ïa ka mynsiem.
Haba ki rwai ki siaw bad ki ïaroh ïa u nongthaw, kumta keiñ ki sim barit kim ju blaw hapneh ka meimariang. Kane keiñ ka dei kata ka jinghikai kaba u briew u ioh na ki sim barit ba ha ba ngi ïai ïaroh ïa u nongthaw da lei lei ngin ym im khuslai hynrei ha ka jingkmen te ngin don.
