![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
New Delhi, Nailur 19 (UNI)
Ka seng Congress ha ka Sngi Ba-Ar ka la kynthoh ba ka aiñ rew halor ka jingai bhah ba 33% ïa ki kynthei ha Lok Sabha bad ki Ïingdorbar Thawaiñ ha ki jylla ka dei ka “jingshet kylla” ïa ki klur ngut ki longkmie bad ki kynthei jong ka Ri.
Haba kynthoh ha rynsan X, u General Secretary ka Congress, u Jairam Ramesh, u la ong, “Ha kane ka aïom jong ka jingkular thok na ka bynta ka ilekshon, kane ka dei kawei na kiba heh tam. Ka dei ka jingshet kylla ïa ki jingkyrmen jong ki klur ngut ki longkmie bad ki kynthei.”
Ki jingkynthoh jong u Jairam ki la long hadien ba ka Sorkar Pdeng ha ka Sngi Ba-Ar ka la wanrah ïa ka aiñ rew ban ai bhah 33% ïa ki kynthei ha Lok Sabha bad ki Ïingdorbar Thawaiñ ki jylla.
“Kumba ngi la kdew mynshwa, ka sorkar u Modi ka khlem pat leh ïa ka khanasamari jong u snem 2021, bad dei tang ka India napdeng ki Ri G20 kaba khlem lah ban pyndep ïa kane,” u la ong.
Haba bteng ban takraiñ ïa ka sorkar u Modi, u Jairam u la ong, “Mynta ka sorkar ka ong ba ka jingai bhah ïa ki kynthei kan treikam tang hadien ba la pyndep ïa ka khanasamari ba la leh hadien ba katei ka aiñ rew kan long aiñ pura. Lano yn sdang ïa kata ka khanasamari?”
Shuh shuh u la ong nalor jong ka khanasamari, ka aiñ rew kan treikam hadien ba la pynbeit thymmai ïa ki konstitwensi. “Hato ïa kata ka khanasamari bad ka jingpynbeit thymmai ïa ki konstitwensi yn leh hashwa ka ilekshon Lok Sabha 2024,” u la kylli.