U Nongsaiñ Hima, 1969
Mynhyndai eh, mynba ki syiem Mawsmai ki dang synshar ha Mawsmai ïa ki thaiñ ri – lum bad ri – war baroh, bad ba ka it ka hima, ki khun ki hajar baroh ki shong haka suk ka saiñ, don kawei ka wah kaba ki khot ka wah Mawlyntang, hapdeng Mawsmai bad Sohra, kaba u sher u jei bha. Ki samla kynthei bad shynrang, ha ki por ba kila dep la ka trei ka ktah, ka leit ka wan, khamtam ha ki por synrai, sadhai ki ju leit tong sher na shata.Ki shnong kiba na sha ba kham marjan, ki ju ïaïeng shrak la ki tyrsong – tyrsong, la ka siaw, la ka siaw, la ka rai, la ka kmen ka sngewbha khlem khulei. Kum ha kita ki sngi, ki phud jong kata ka wah, bad ki khlaw kiba ker ïa ka, ki sawa da ki sur jingrwai lum kiba pynkie ïa ka dohnud.
Ha kawei ka sngi synrai ka barang bha kdiar kdiar, katto katne ki samla na ki thaiñ Mawsmai, ki la khreh ir ka leit tongsher na kata ka wah. Haba la dap shiteng sngi ne, kawei ka khynnah syiem kaba kyrteng ka Rytiang, ka la sngewthait bad kala shongkai noh halor uwei u maw uba don ha ryngngi jong ka wah. Ki paralok jong ka, ki la nang shongshit la ka tong dohkha bad la ka ïakob ban iarwai marshiliang – lum shiliang wah, ki la nang ïatong ïarwai bad ki la nang – hiar kham sharum. Hynrei ka pat, tang shiphang ka la iohthiah ngai hangta haba shong. Hamar kata ka por, ha rngai ka la iohi ïa uwei u briew uba bha briew lymphuiñ, uba ka main jong u kaba ishongkhia bad shongkum shibun, ba u wan sha ka bad u ong : “Hakhmih kane ka tyngka nga wan noh ïa phi shi – singnala, to sotsakuolar ïa nga ba phin phah shna uwei u mawpun halor kane ka wah, ban long ïaid na shitliang sha shiliang, ynda phi la dep, thaw pat kawei ka ïing kaba da ki maw suda, naduh u rishot u rijied haduh ka krung ka knap baroh, bad lada kane ka tyngka kam dap biang, ngan sa nang wan rah shuh. Te ynda kata ka ïing ka la dep, ngan sa wan shong, phi ruh phin sa iohi ba phin long ka briew kaba don ram tam ha ka pyrthei.” Bad u la shu jah noh jar. Ynda ka la kyndit nangta naba thiah, ka la shem shisha ia kata ka tyngka shi – singnalai, ka la lyngngoh ngain khlem ang pyrkhat shuh. Bak bak ka la khung ïa kata ka tyngka bad ka la leit phai sha la ïing, ka la puson bad ka kmen ym tip briew ym tip mrad shuh. Hynrei hano hano ruh kam shym ïathuh ïa kata baroh kaba la jia.
Ynda katto katne por hadien kata ka tongsher, ka la wer ïa ki lok – ki jor, ki kha ki man, bad ki para shnong para thaw baroh ban buh mawpun ïa kata ka wah. Ka la thied khaw u kha ka dohkha dohpnat, ka sniang ka syiar, ka kiad ka um bad ka la pynlong ka khawai dawai ka bakhraw. Haba la dep uta u mawpun, ka la khreh thaw sa ka ïing ka sem ka la phah tih maw rijied rishot, ki mawkynroh ki maw synkien, haduh ba la twa ka lum ka wah bad la shlei ka madan madiah baroh. Katba ka dang khreh kumne, ka la kum pynkheiñ noh ïa ka jingsotsakular bad uta u briew, bad shen hadien khyndiat sngi ka la ïap noh.
Kita ki maw ki la shu sah lyngkrang – lyngkreit shane shata, ha ka jaka kaba ki khot mynta ka Saitsohpen bad la shu pynduh – ei, pynbijai ei khoit da kito kiba la wan kham hadien ban buh ai shnong ha Saitsopen. Haduh mynta mynne bad haduh kine ki sngi, ia ka shnong ba la buhai hajan uta u mawpun, ki khot ka shnong Mawpun – kyrtiang, ba ki ioh sin na uta u mawpun jong ka Rytiang, hynrei uta u maw, naduh u jumai – bah u la kheiñ bad u la pait la ka jong ka jong bad lah ban iohi sa tang katto katne hapoh jong ka wah. Haduh mynta – mynne, kawei ka lyngknap jong uta u mawpun, ka dang sah ha wah, bad ki thliew kynroh harud wah ha kiba la pynshong ïa uta u maw ki dang sah tyngkrein.
