Staten Island, Nailur:
U President ka Ukraine, u Volodymyr Zelensky ha ka Sngi Nyngkong u la leit jurip sha ka hospital hapoh United States kaba la pynthiah bad sumar ia ki shipai ka Ukraine kiba la mynsaw hapdeng ka jing-iakhun thma bad ki shipai ka Russia ha kine ki por ba la leit. Hynrei haba u peit ia kitei ki shipai ka Ukraine kiba la dkut kti-dkut kjat na ka jingshah thombor ha ki shipai ka Russia, u Zelensky u don tang kawei ka kyntien hashwa ba un leit sha ka jing-ialang ba la khot da ka United Nations (UN) bad katei ka long ka kyntien ‘Lehnoh’ ba u Zelensky u la pyniahap ia ka Russia bad ki lehnoh namar ka jingleit hiar thma dusmon jong ka ban ioh pynjot pynum ia ka Ukraine bad ban pyniap thngan ia ki paidbah nongshong shnong ka Ukraine ha kiba bun ki liang.
Hynrei, u Zelensky u la ai mynsiem bad kitbok kit rwiang ia kitei ki shipai ba kin khlaiñ noh bad ba kin ym duh jingkyrmen ne kynran dien noh, hynrei ba kin don ia ka mynsiem kaba eh bad ban nym aili ia kiwei pat ki bor ba nabar ba kin wan iuh roit ia ka jaitbynriew hapoh u pud- u sam lade.
Ha katei ka hospital ba u leit ban jurip hapoh United States, u Zelensky u la iohi ia ki shipai ka Ukraine kiba la shu pyndait da ki kti bad ki kjat nar tang ban pyndap ia ki bynta ba la dkut noh bad ha katei ka jingleit jong u, kitei ki shipai ki dang pyrshang ban pynkhih bad ban rah ia ki kti-ki kjat jongki sa shisien pat hadien ba la pyndait da kitei ki tiar kiba khia bad kiba kham shem jingeh ia ki ha kaba sdang ban pyndonkam ia ki.
Hynrei, watla u la ialeh ban pyn-eh bad ban ai mynsiem ia kitei ki shipai kiba la mynsaw bad duh noh ia ki dkhot met jongki, utei u nongialam da ka jingkhñiuh bad jingisynei, u la ai khublei ia ki bad kylli ruh ia uwei na kitei ki shipai “Ka long shisha kaba eh ne m ban pyndonkam da kitei ki tiar ba shu shna bad ba la pyndait ha ki?”, ha kaba utei u shipai ruh u la ong ba ka long hi kaba eh da kumno- kumno ruh namar watla ki la ioh biang ia ki kti- ki kjat ba la dkut hynrei kam long kaba suk ban trei ban ktah bad ban pynkhih ia kitei ki dkhot met jongki ban ia nujor bad ka jinglah jongki ha ki por ba la leit.
Kumjuh ruh haba u leit ban kren sa ia uwei pat u shipai uba dei na ki thaiñ South jong ka nongbah Zaporizhzhia jong ka Ukraine, kaba long ka thaiñ ba jur bha ka jingïakhun hapdeng ki shipai ka Russia bad ki jong ka Ukraine ha kine ki khyndiat por ba la leit.
U Zelensky u la kylli ia u “kumno phi long? Kumno phi sngew?” bad utei u shipai u la ong “It’s okay”, kaba mut ba um sngew eiei watla u hap ban mad ia ki jingeh namar la ka ri bad ka jaitbynriew bad kumta u Zelensky ruh u la ai khublei ia ka jingshlur bad jinglen lade jongkitei ki shipai bad u la ong ia ki ba kin long khlaiñ bad kin ym duh jingkyrmen namar ka jinglen lade jongki kan ym sep-ei da leilei ruh namar ka Ukraine kan iakhun tyngeh ban ioh knieh biang wat ia baroh ki bynta ba la shah knieh ha ka Russia naduh ki por ba la leit ruh.
Ia kaba mynta, ki don 9 ngut ki shipai ka Ukraine kiba dang shah sumar ha katei ka hospital hapoh United States bad katei ka hospital ka la ioh ban pynim haduh 35 ngut ki shipai kiba la leit pynkit sha United States hadien ki jingmynsaw jur jongki na ka jingiakhun jongki bad ki shipai ka Russia.
La ong ruh ba watla ka Ukraine kam shym ai jingkheiñ thik- pa thik halor ka jingdon ki shipai jongka kiba la mynsaw bad khlad hapdeng ka jingiakhun thma bad ka Russia, hynrei ki heh ka US ki la shu buhjingkheiñ antad ba da kumno- kumno ka jingdon ki shipai ba khlad bad mynsaw ha katei ka thma haduh kane ka kynti kan poi beit kumba 5,00,000 ngut.
Kumjuh ruh shwa ba un mih noh na katei ka hospital, u Zelensky u la iathuh ia kitei ki shipai ba ki nongsumar ka United States ki la ïaroh ia ka jingshlur bad jinglen lade jongki naka bynta ka ri bad kumta ruh ka Ukraine ka ap ban ioh pdiang sngewbha biang ia ka jingwan phai jongki sha la iing bad ka Ukraine ka donkam ruh ia ki shipai ba shlur kum ma ki naka bynta ban pynher krad bad ban ioh pynkhyllem ruh ia ki nongshun kiba wan thombor ia ka ri.
