Shillong, Nailur 19
Wat la ka India ka la lah ban ïalehkai bha ha ka kylla step, hynrei kane kynhun ïalehkai phutbol ka ri ka la mad noh ïa ka jingshah rem ha ka China da 1-5 kol ha ka jingïalehkai kaba nyngkong (group) ha ka 19th Asian Games ha ka sngi Ba-ar ha Huanglong Sports Centre Stadium, kabaa Hangzhou.
Ha kane ka jingïakhun ki rang-ïalehkai ka ri ki la pyrshang ban ïakhun tyngeh naduh kaba sdang, hynrei tang ha ka minit kaba 17 ka la shah thep shi kol ha ka China lyngba u Tianyi Gao. U Rahul KP u la long tang marwei ban pynphai kylla shi kol ïa ka India hashwa ban kut ka jingïalehkai jong ka kylla step.
Hadien ba la bteng ïa ka jingïakhun jong ka kylla miet, ka China ka la wan phai da ka jingkhlaiñ bor ha kaba ka la pynbud ïa ka kol kaba ar lyngba u Dai Weijun ha ka minit kaba 51.
Ka China ka la thep biang sa ar kol lyngba u Tao Quianglong ha ka minit kaba 72 & 76. Kane ka kynhun kaba khlaiñ bor ka la thep biang sa shi kol hashwa ban wai lyngba u H Fang ha ka minit kaba 90′ + 2 na ka bynta ban khur syndon ïa ka jingjop kaba nyngkong ha ka Group-A.
Hashwa ban wai u rangïalehkai ka Jylla u Samuel James Lyngdoh Kynshi u la ïoh mih madan ha ka minit kaba 86 haka jaka jong u Amarjit Kiyam.
Te kumta ka India kan pynkhreh ïa ka jingïakhun kaba ar pyrshah ïa ka Bangladesh ha ka 21 tarik bad ïa ka Myanmar ha ka 24 tarik.
