Shillong, Nailur 19
Ka East Khasi Hills Cricket Association ka la lah ban ïalehkai bha ha ka liang ban tied bad kawang bol da kaba ka lah ban pynliem noh ïa ka West Khasi Hills District Cricket Association da 159 run ha ka Zone 1 (Group-B) jong ka lympung ïalehkai U-19 Boys Inter District Cricket Tournament ba la pynïaid da ka Meghalaya Cricket Association ha ka Sngi Ba-ar.
Kham hashwa ka East Garo Hills DCA ka la pynkhyllem lut ïa ki nongtied ka North Garo Hills DCA na ka bynta ban jop da 19 run ha ka Zone 2 kaba don tang kawei ka group.
Ha ka jingïakhun kaba la long ha Umbuda, Nongpoh, ka EKH ka la shimti ban tied nyngkong ha kaba ka la lah ban kamai 216 run bad shah pynkhyllem 3 wiket ha ki 28 over. Ka jinglah ban ïalehkai ki ar ngut ki nongtied ka EKH kata u Despenly Syiemlieh uba khlem shah pynkhyllem da kaba tied 85 run na ki 76 bol (7x4s, 3x6s) bad u Arwanbiang Shangpliang uba la lah ban tied 62 run na ki 59 bol (7x4s & 3×6). Kine ki ar ngut ki nongtied ki la lah ban noh synñiang 109 run na ka bynta ka wiket kaba nyngkong. Ïa ka shi wiket la khur da u Gabriel Thabah (2/45).
Haba wan beh ïa ka thong, ki nongtied ka WKH ki la shah pynkhyllem lut baroh bad kamai tang 57 run ha ki 15.4 over. Kane ka jingshah pynhap wiket ka la wan urlong lyngba ka jingïa-lehkai bha u Daulabiang Shangpliang, uba la lah an khur haduh 6/15 ha ki 3.4 over. U Banpynkmen Kharsyntiew u la long tang marwei uba la kamai bun na ka bynta ka WKH ha kaba u la tied 11 run.
Haba phai sha kawei pat ka jingïakhun kaba la long ha Salpara, Mendipathar, ka EGH ka la khur ïa ka jingjop kaba ar ha kine ki khyndiat sngi ha kaba ka la ïakhun tyngeh pyrshah ïa ka NGH; hynnin ka sngi ka EGH ka la lah ban pynliem ïa ka South Garo Hills DCA da 8 wiket.
Hynne ka sngi ka EGH kaba la shimti ban tied nyngkong ka la khyllem lut baroh ki nongtied na ka bynta ban kamai 137 run ha ki 23.4 overs. U Lensbirth N Marak u la tied 53 run na ki 51 bol (4x4s, 3x6s) na ka bynta ban long u nongtied uba la kamai bun run bad mynta ka sngi u la khyrwit ïa ka shiteng spah run. Ïa une u rangïalehkai la kyrshan lang da u Thunun N Marak, ha kaba u la 39 run (1x4s, 3x6s). U Dorith Marak u la long u nongkawang bol ba kynsai ka NGH, ha kaba u la lah ban khur 4/44 ha ki 4.4 over. Ïa kiwei pat la khur da u Fraidian Momin (2/9) bad u Chongkam Marak (2/15) kiba la ïoh khur mar ar wiket.
Haba wan shimti ïa ka pali kaba ar ki nongtied ka NGH ki la shah pynkhyllem lut baroh na ka bynta ban kamai 118 run ha ki 23.1 over. U Rituraj u la ïoh ban tied 37 run na ki 35 bol (1x4s, 3x6s), katba u Dallang Sangma u la noh synñiang na ka bynta ban tied 24 run na ki 28 bol. U Gulgul Sangma u la lah ban khur 4/8 ha ki 5 over na ka bynta ka EGH, katba u Andam N Marak u la khur with 2/17 ha ki 4.1 over.
Ka jingïalehkai ha ka sngi Balang kan long hapdeng ka Ri-Bhoi DCA pyrshah ïa ka East Jaiñtia Hills DCA ha ka Zone 1 (Group-A), katba ka South Garo Hills ïa ka Tura DCA ha ka Zone 2.
