U Nongsaiñ Hima, 1969
U Ho Chi Minh um don shuh bad niar ba kum une u radbah, uba long u nongïalam uba shlur bad skhem jingmut ïa ka jaidbynriew Vietnam hapdeng ki jinjgeh kiba khraw bad ba ula bat skhem ia ka sharak jong ka jinglaitluid da ka jingphira miet sngi jong ki paidbah bad jaidbynriew jong ine i ri Vietnam iba rit.Ka Vietnam mynshuwa eh ka la ju shah ban beiñ ha ki Japan bad hadien la wan dakhol sa ki France.
U Ho Chi Minh naduh ba u dang khynnah ula shim bynta ha ka jingïaleh ban pyllait ïa ka ri bad ka jaidbynriew na ka lyngkor jong ka jingsynshar nongwei ki France bad ha kata ka por u la long tang u khynnah kit khubor. ïa ka mynsiem jong u kaba la tbeh da ka jinglong – balaitluid ka la kyntiew ïa u shaduh ka kyrdan jong u nongïalam bad nongsharai ïa la ka jaid ka kynja. Wat hapdeng ka apot bad nusib kaba sniew ïa ka Vietnam u Ho Chi Minh um shym la ran dien. ïa ka France, ki Vietnam ki la py nher krad, hynrei la phiah ïa ka ri ha ki ar bynta, ka Vietnam shatei bad ka Vietnam shathie.
Da ka jingïap u Ho Chi Minh ha ka rta tymmen kaba 79 snem, ka Russia bad China kum ki khlieng ki la swait ban teh lakam ïa ka Vietnam lyngba ka seng Communist. Hynrei ka don ka jingkyrmen kaba khraw baw at ki Vietnam shatei kaba la kylla Communist kan nym shah ïa ki bor nongwei ban shong kulai nalor jong ki, khamtam haba ki la mad ïa ki soh kiba kthang jong ka jingïap bad jingumsnam ha ka jingïaleh pyrshah ïa ki bor radbah kum ka France bad America. U paidbah ka Ri Vietnam un hap rai hi ïa ka lawei bad khlem pep ka jingïaishah bad jingtheh ïa ka umsyep bad ka snam ha kine ki arphew laiphew snem lynter, kan siew ïa ka jing-angnud jong kiba shatei bad ka shathie ban long kawei ka ri kaba khraw, ha kaba ki nong Vietnam kin long ki kynrad ïalade.
Ka Ri Ireland ka long ka Ri ba la phiah ar bynta, kaba shathie ka long kaba laitluid bad synshar ïalade bad kaba shatei ka dang sah hapoh u pud u sam jong ka Bilat. Ka Ireland ba shatei ka don la ka jong ka Sorkar Jylla, wat la ka hap hapoh ka Sorkar Bilat, bad la jia ki jingjia ba sngewsih ha kane ka Ri, ha kaba la don ka jingïaumsnam bad thma – kynti hapdeng ki ar kynhun ki nongshong shnong.
Ka jingkyrmen ba kane ka jingia – pynpait khlieh kan jem noh ka shong ha uwei u briew, u James Callaghan, uba dei uwei na ki myntri badonbor bad ba don khlieh jong ka Sorkar Bilat. Ha u la pynshet ka jingshaniah da baroh ki kynhun bad da lade u la leit jngoh bad sei ïa ki lad kiba lah ban syrpai ïa kane ka jingïakajia. Kaei ba u Callaghan ula lah ban leh ka long ba kan don ka seng ka ban kynthup ïa ki ar kynhun ka ban trei na ka bynta ka jingïadei bad jingïabha ïamiat hapdeng kine ki ar kynhun,bad ïa kane la mynjur da baroh arliang. Khnang ba ki rit paid kin nym sngewbha ki shah ban beiñ la mynjur ruh ba ka Sorkar kan kynthup ïa uwei u Myntri u ban khmih khnang ïa ki jingeh bad jingshitom ba ïakynduh ki rit paid man la ka por. Kan don ruh ka commission hapoh uwei u nongbhishar Bilat ban tohkit ïa ki jingjia ba dang shen. Na kine ki dak, ki jingpyrshang jong u Callaghan ki kdew shai ba ka jing-ïatylli bad jingiasyllok hapdeng kine ki ar kynhun bad jingïasyllok hapdeng kine ki ar kynhun ki la sdang pat ban wandur bad ki ai jingkyrmen shibun ba yn sa lah hadien habud ban pynlong ïa ka Sorkar Irelang ba shatei, ka ban kynthup lang ïa ki nongmihkhmat na kine ki ar ki kynhun ka ban peit ïaka jingbit jingbiang jong u nongshong shnong shityllup ka Ri.
