Shillong, Nailur 19
U nongïalam ka All India Trinamool Congress (AITC), u Dr Mukul Sangma u la ïashimbynta ha ka jingïatai ha Ïingdorbar Thawaiñ ha ka Sngi Ba-ar halor ka jingjyllei u drok ha Jylla bad u la pyni ruh ïa kawei ka dur kaba u Myntri Rangbah u Conrad K Sangma u la shondur lang bad uwei u briew uba shah kynnoh khaïi drok uba dei na Mizoram.
U Dr Mukul uba la pynpaw ïa ka jingma jong u drok bad jingkhuslai jong ki kmie ki kpa ïa la ki jong ki khun, u la maham ba kum ki nongmihkhmat paidbah dei ban da husiar haba ïakynduh bad ki briew kiba kumno, kiba ym lah ban tip ïa ka jinglong jingman jong ki.
U la ïashimbynta ha ka jingïatai halor ka mat ka jingma jong u drok kaba la wanrah da u MLA ka Nongkrem u Bah Ardent Basaïawmoit.
Haba kren shaphang kane, u Dr Mukul u la wanrah ruh ïa kawei ka khubor kaba la pynmih naduh u snem 2013 ha kaba ïadei bad ka jingshahkem uwei u briew uba kyrteng u Henry Lalremsanga, uba na Mizoram, uba la shah kynnoh kum uwei na ki snar nongkhaïi drok ba shongdor kumba T.6 klur.
U Dr Mukul u la ong ba une u briew la lap ba u don ruh ka jingïadei bad u Myntri Rangbah u Conrad K Sangma, ha kaba la lap ruh ïa kawei ka dur ba ki shongdur lang bad ka kurim jong u lem bad u Henry ha kawei na ki jingïakynduh ki heh ki haiñ ha New Delhi.
U la buh jingkylli ruh kumno une u briew u ïoh rung sha katei ka jingïakynduh jong ki heh ki haiñ.
U la ong ba um buh jingkylli ïa ka jingshondur u Myntri Rangbah bad kiba bun ki briew, hynrei u kwah ban pynpaw paidbah namar ka long ka jingmaham ba ki briew kiba don dak sniew kin shim kabu pynban.
Haba ïakren shabar ka Ïingdorbar hadien ba la wai ka dorbar, u Myntri Rangbah u la ong ba kum u nongïalam paidbah, u ïakynduh bun ki briew ym lah ban ñiew bad ki ju don ruh bun ngut kiba shondur bad u.
Kumta u la ong ban shu pynïasoh ïa ki briew bad wanrah noh kano-kano ka jingkynnoh tang namarba ka jingshondur ka dei ka bym shong nongrim.
U la ong ba donkam ban pynshisha kiei ki kam kiba leh bad donkam ban wanrah ki sakhi.
U Conrad u la ong ba ka long kaei kaei ka bym ïahap ba la shu pynkut tang halor kawei ka dur ne ban shu pyrshang ban wanrah ka jingaiksai ba u Myntri Rangbah u donbynta ei ei.
U la ong ba lada don kumta kata, ka la dei ban paw paidbah, hynrei lada ka long kumne, kamut nga hap sangeh ban shondur bad ki paidbah bad sangeh ban leit sha ki jingïalang.
Namarkata, ngam tharai ba tang namarba lap ïa ka dur ba shon lang yn shu pynkut noh ba baroh ar ngut ki don ka jingïadei lane ban ong ba ki leh lang ïa kam ka long kaei kaei kaba bakla ban shu pynkut kumta.
