Los Angeles:
U Steven Spielberg bad ka Kate Capshaw ki la ai jingiarap bad noh synñiang haduh $1mn sha ki dkhot ka SAG/AFTRA ha kaba kine arngut kim lah satia ban shu peit tang da ka khmat hadien ba ki iohi ia ki jingeh kiba ki dkhot jong ka SAG/AFTRA ki mad naduh ba la pynlong ka jingsangeh treikam ha Holly wood.
Haduh hajar ngut ki dkhot ka SAG/AFTRA ki la shem jingeh ban pyndap pynbiang haiing hasem na ka daw jong ka jingbym donkam donjam ha kaba bun ki la shu kyrmen ba da ka jing leh isynei bad da ka jingai jingiarap lem jong kiba bun kin ioh hi ka lad ban pynbiang ia ki jingdonkam haiing hasem.
Ka jingwan sha khmat jong kiba bun ki khlur ak phlim ka la long ka jingmyntoi bakhraw ia ki dkhot ka SAG/AFTRA bad mynta sa u Steven bad ka Kate ki la shim ruh ia ka lad ban ai jingiarap kat kaba ki lad eh sha katei ka seng.
Naduh ba la sdang ka jingiakhih ha u Jymmang la ong ba ki dkhot ka SAG/AFTRA kim shim la ioh ia ka jingsiew bad ka jingsngap mynthi jong ki hehduh jong ki kompani pynmih phlim kan nang pynjur shuh shuh ia kane ka jingiakhih bad ka la don ruh ka jingiakren ba kane ka jingiakhih kan iai bteng beit kumne khlem sangeh.
