Los Angeles:
U Micheal Caine u la shim ia ka rai ban shongthait noh na ka kam ak phlim ha kaba kane ka dei tang shu dep ak ia ka The Great Escaper ha kaba une u tyngshop u sngew ba ka por ka la biang ia u katto ban sangeh noh ban ak phlim bad ban pynleit jingmut ban sumar noh ialade.
U Sir Micheal Caine u dei uwei na ki tyngshop bakhraw jong ka Hollywood bad ula don bynta bad kane ka karkhana la bun bun snem mynta. Kum u tyngshop u Micheal ula ioh ban ak ha kiba bun ki phlim ba itynnad bad ha ka rta kaba 90 snem u Micheal u sngewdei ba un hap ban sangeh noh syndon ban ak phlim.
Ha ka jingiaid lynti jong u kum u tyngshop u Micheal ula shim bynta ban ak haduh 160 tylli ki phlim.
Ka Great Escape kan dei ka phlim ba khatduh eh ba ki nongpeitkai kin iohi ia u Micheal ha kaba ha kane ka phlim ula ak ia ka bynta kum u Bernie.
Ka khana jong ka Great Escape ka iathuh halor u Bernard Jordan uba long uwei na ki shipai jong ka World War II bad uba ha ka rta kaba 89 snem ula mih tuh na kawei ka jaka ai jingsumar ban ioh leit shim bynta ha ka jingrakhe ia ka jingdap 70 snem ka D-Day.
Kawei na ki daw halor ka jingthmu u Micheal ban iehnoh syndon ia kam ak phlim ka dei namar ba u sngewthuh ba ka met ka phad jong u kam ailad shuh bad mynta ula sngewthut bha ban iaid ban ieng bad um long shuh kumba long ha ki por bad snem ba laleit.
U Micheal ula ak ia kiba bun ki bynta ha ki phlim kaba long ruh kaei kaei kaba ki nongpeitkai ki ai jingiaroh bha ia u.
