Shillong, Nailur 20
U nongkawang bol jong ka ri u Mohammed Siraj u la bteng ban jam sha ka kyrdan ba nyngkong kat kum ka kyrdan ba la pyllait na ka bynta ka ICC napdeng ki nongkawang bol ha ka ODI.
Kane ka la wan urlong hadien ba u la lah ban pynkhyllem 6 wiket ha ka final jong ka Asia Cup kaba dang shu kut shen.
U Siraj, uba la ïoh ban bat ia ka kyrdan ba hakhlieh ha u Kyllalyngkot hashwa ba un shah knieh noh ha u Josh Hazlewood ha u Lber, u la wan ha ka kyrdan ba phra lyngba ka jingïalehkai bha ha kaba u la lah ban pynliem noh ïa ka Sri Lanka na ka bynta 50 run bad bat pynkut da ka jingjop ba 10 wiket.
Na ka liang uwei pat u nongkawang bol u Kuldeep Yadav u la jam lai kyrdan kata sha kaba khyndai. U Jasprit Bumrah u la jam ar kyrdan kata sha kaba 27, katba u Hardik Pandya u la jam phra kyrdan kata sha kaba 50.
Napdeng ki nongtied, u Shubman Gill bad u Rohit Sharma ki la ïai bat ïa ka kyrdan ba-ar bad ba shiphew, katba u Virat Kohli u la jam sha ka kyrdan ba phra. U Pandya u la long tang marwei na ki ‘all-rounder’ ban don hapoh ka thup kaba 20, hadien ba u la jam haduh hynriew kyrdan.
