Shillong, Nailur 20
Ka lympung ïalehkai U-20 4th Division Football League 2023 ba la pynïaid da ka Shillong Sports Association ka la bteng biang ha ka sngi Balang ha kaba ka Dilingiem YSCWA, Laitumkhrah SC, Mawlynrei SC bad ka Nongkohlew SC ki la khur jingjop ha ka sngi Balang.
Ha kane ka jingïakhun kaba la long ha madan Third Ground, Polo, ka Dilingiem YSCWA ka la khur ei ïa ka jingjop khlem da sei bor na ka daw ba ka Laitlulong SC kam shym la wan mih madan. Te kumta kat kum ki kyndon ïalehkai phutbol, ka Dilingiem YSCWA ka la khur ïa ki 3 point lem bad ki 3-0 kol.
Ha ka jingïakhun kaba ar, ka Laitumkhrah SC ka la pynliem noh ïa ka Mawphlang SC da 4-0 kol. Ïa kine la thep da u Hamlet Thabah ha ka minit kaba 34, kumjuh u Maban Lanong (35), Ivan Garry Kharbuli (70) bad u Aldhues Nongbri (70+3).
Ha ka jingïakhun kaba lai, ka Mawlynrei SC ka la jop da 3-2 kol ïa ka Lumpyngngad SC. U Kerry John Marboh u la thep ar kol (61 & 67) na ka bynta ka Mawlynrei bad ïa kawei pat la thep kham hashwa da u Heraldo Kyrsian (4). Katba na ka Lumpyngngad la thep da u Eladmi Pastieh (8) bad u Donlang Kharsyiemïong (41).
Ka Madanrting SC ka la shah rem noh ha ka Nongkolew SC da 2-0 kol bad kane ka la wan lyngba ki ar kol ba la thep da u Shain Mujai ha ka minit kaba 45 & 68.
Haba phai sha kawei pat ka jingïakhun kaba khatduh hapdeng ka Mawklot SC bad ka Lummawbah SC ki la ïasam mar shi point hadien ba ki la ïakhaid mar 1-1 kol.
Tang mar ïasdang ka jingïalehkai ka Mawklot ka la ïoh ban pynkhih jar nyngkong eh lyngba u Paila Rapsang ha ka minit kaba 7, hynrei hadien shiteng kynta ka Lummawbah ka la lah ban pynphai kylla lyngba u Deron Kharpuri ha ka minit kaba 33 na ka bynta ban ïakhaid mar shi kol.
