Shillong, Nailur 20
U Lamphang ka ïingdorbar thawaiñ ka Jylla u Thomas Sangma ha ka sngi Balang u la ai ïa ka rai ka jong u hapoh ka ïingdorbar ban weng noh (Expunge) ïa ka jingkynnoh u Dr Mukul Sangma ïa u Myntri Rangbah ka Jylla Conrad K Sangma ba u don jingïadei ba ïajan bad u heh nongkhaïi drok na Mizoram na ka mat ïatai ne proceeding jong ka ïingdorbar namar ka jinglong pyrshah ïa ki kyndon aiñ.
Haba pynbna ïa kane ka rai da kaba kdew ruh ïa ki kyndon, u Lamphang u la ong, “Da kaba pyntreikam ïa kine ki kyndon aiñ, nga la weng noh ïa kine ki jingkynnoh ba la pynmih da u Mukul Sangma na ka mat ïatai hapoh ka ïingdorbar namar ki long pyrshah ïa ki kyndon.”
U Lamphang u la pynpaw ba ka ïingdorbar thawaiñ ka Jylla ka dei kaba la tip da baroh ba ka dei ka ïingdorbar ba donburom tam hapoh ka Ri baroh kawei. Kumta ym dei ha kane ka ïing ban ïakhot kyrteng ne pynmih ïa ki jingkynnoh khlem da lah ban ai ïa ki sakhi satar kiban kyrshan ïa ka jingkynnoh.
“Nga la batai ïa kane ka kam haba kdew ïa ka rule 279a, ki jingkynnoh ki hap ha kane ka rule bad katkum ka rule 304, la aibor ïa u Lamphang ban weng ïa ki jingkren na ka mat, lada mih ki jingartatien, ka rai jong u Lamphang kan dei kaba khatduh bad kumta, nga weng noh ïa ka jingkren u Dr Mukul Sangma kum ka jingpynkheiñ ïa ka rule 279a.”
Kane ka jingpynpaw jong u Lamphang ka la wan ruh hadien ba u Symbud Myntri Rangbah ka jylla u Bah Prestone Tynsong uba dei ruh u in-charge ka Parliamentary Affairs u la kyrpad ban weng noh ïa ki jingkynnoh jong u Mukul pyrshah ïa u Myntri Rangbah ka jylla, kata da kaba kyntu ruh ïa MLA ka Songsak ba un kiar ban pynshongnia lyngba ki dur ki dar.
Katba na ka liang u Mukul Sangma haba pynpaw halor katei ka jingkren u la ong ba u Symbud Myntri Rangbah u la sngewthuh bakla halor ka jingmut jong kane. “U briew uba ka kyrteng jong u, ka la mih ha ki ‘national media’ u dei u briew uba la shah kynnoh ym uba la shah rai pynrem. Ngam shym la kynnoh halor kino kino ki kam bymman kiba la leh kumba la pynpaw ha ka dur. Nga sngew ba ka long kaba donkam ban long kham husiar haba ngi don ha ka kam bad ka bor ba la pynkup katkum ki riti synshar khadar,” u la ong.
“Nga la pynpaw ha ka jingkren jong nga ba nga ai jingmut ïa u Myntri Rangbah ka jylla na ka bynta ban kiar ïalade na ka jingdon jingïadei bad kiba kum kine ki briew ïa kiba ym lah satia ban tip ki dei kiei. Ka shong ha u Myntri Rangbah ban buh ïa ki ha ka jinghusiar, kane ka dei kaba nga ong. Hynrei mynta balei ba Sorkar ka khuslai bad lynga na ka bynta ban ïada ïa ka,” la ong shuh u Mukul.
Haba pynpaw ïa ka jingsngewkhia ba ka kyrteng jong u ka la mih sha ka jingïatai ka bym i donkam, u Myntri Rangbah, Conrad K Sangma u la bthah ïa u Mukul Sangma ban wanrah ïa ki jingshisha halor ka case jong une u briew bad ruh ban sei ki jingshisha halor kane ka case, mynno kane ka case ka jia bad shaei ka la poi.
