Shillong, Nailur 21
Ka West Jaiñtia Hills District Cricket Association ka la jop sa shi wiket ïa ka East Khasi Hills Cricket Association ha ka Zone 1 (Group-B) jong ka U-19 Boys Inter District Cricket Tournament ba la pynïaid da ka Meghalaya Cricket Association.
Ha kawei pat ka jingïakhun hapdeng ka Tura DCA bad ka North Garo Hills DCA ha ka Zone 2, la hap ban pynsangeh ha Salpara, Mendipathar khlem da ïoh ban kawang bol.
Ha katei ka jingïakhun kaba la long ha madan Umbuda kaba ha Nongpoh, ïa ka jingïalehkai la hap ban pynhiar sha ki 25 over ha baroh arliang. Ka EKH kaba la jop ïa ka kynting pisa ka la shimti ban tied nyng-kong ha kaba ka la kamai 132 run bad shah pynkhyllem baroh ki nongtied.
Ha kaba nyngkong kane ka kynhun ka la ïakynduh jingeh na ka daw ka jingshah pynhap wiket noh ki lai ngut ki nongtied kiba kynsai na ka bynta 30 run. Hynrei lyngba ka jingïalehkai bha u Nangsan Kynter (14) bad u Daulabiang Shangpliang (35) kaba la pynlong ïa ka EKH ban kynjoh sha ka 100 run.
Hadien ka jingshah pynhap lai wiket na ka bynta ki 5 run, ka EKH ka la ïakhun tyngeh ban kynjoh 107/8. Ka jinglah ban ïalehkai bha u Jentizen Marpna, uba la lah ban tied 16 run (not out) na ki 11 bol, ka la pynlong ïa katei ka kynhun ban kamai 132 run. U Namewanki Pakynteiñ u la khur 3/20 bd u Byforcestar Dhar u la ïoh 2/25.
Haba wan beh ïa ka thong, ka West Jaiñtia Hills ha kaba nyngkong ka la kamai 30/3 hashwa ki 47 run ba la ïatied lang hapdeng u Chwamiki Ryngkhlem (18) bad u Namewanki (19). Ka EKH ka la ïakhun tyngeh ban pynhap wiket hahwa ba u Marconi Phawa un tied 33 run na ki 30 bol (2x4s, 3x6s), kaba la pynlong ïa ka WJH ban kynjoh sha ki 100.
Hynrei u Marconi um shym la lah ban shah slem ha kaba u la shah pynhap wiket noh ha kaba ka WJH ka la ïoh 116 run, bad sa tang 17 run ban khur ïa ka jingjop ha ki 3.2 over.
Katei ka thong ban kynjoh kam shym la don jingeh eiei ïa ka WJH, ha kaba u Riata Challam u la ïoh ban khyrwit ïa ki ar tylli ki ‘four’ bad um shym la shah pynkhyllem na ka bynta ban tied 14 run na ki 22, katba u Stellify N. Sten u la ïoh 2 run na ki 4 bol na ka bynta ban jop da shi wiket.
Ki nongkawang bol ka EKH kiba la lah ban pynhap wiket ki long u Damechwa Khongsngi (3/11), Despenly Syiemlieh (2/32) bad u Daulabiang (2/34).
Ka jingïalehkai ha ka sngi Thohdieng ha ka Zone 1 (Group-A) kan long hapdeng ka Shillong Cricket Association A pyrshah ïa ka Ri-Bhoi DCA, katba ka South Garo Hills DCA ïa ka North Garo Hills DCA ha ka Zone 2.
