Shillong, Nailur 21
Ka jingpynkhreh ïa ka marathon ba la tip kum ka 2nd Sohra International Half Marathon ka la long kaba seisoh ha kaba ka jingpynrung kyrteng ki nongïashim bynta lyngba ka online bad offline ki la don haduh 3975 ngut bad ka long haduh san shah na u snem ba la dep.
Ïa kane ka jingïakop mareh kaba kynthup naduh ka Elite 21k, Meghalayan 10k, Run For Fun 5k bad ka Veteran Above 55 yrs ka ban long ha ka 30 tarik mynta u bnai naduh Laitsohpliah sha Sohra haduh Mawsmai, yn pynlong da ka Meghalaya State Olympic Association (MSOA) ha ryngkat ka jingïatrei lang bad ka tnad ïalehkai ka Sorkar Jylla.
“Ngi sngewkmen ba mynta u snem ki la don kham bun ki nongïashim bynta kiba la wan ai kyrteng lyngba ka online bad offline ban ïashim bynta ha ka Sohra International Half Marathon. Kiba kham bun ki dei na Sohra kiba la pynrung kyrteng na ka bynta ka Run For Fun 5k kaba la kot shaduh 2500 ngut na ki 13 tylli ki skul,” la pynpaw u General Secretary ka MSOA u Bah Finely Pariat haba ïakren bad ki nongthoh khubor ha ka Sngi Palei.
Ha kane ka sien ba ar ka MSOA kan pynlut haduh T.1,270,000 kynthup ruh ïa baroh ki khusnam na ka bynta ki nongjop.
“Ka jingsam ïa ki sopti T-Shirt na ka bynta kiba sah ha Shillong kan long naduh ka 26 tarik ha SSA Stadium ha Polo naduh 1 baje haduh 5 baje janmiet. Katba na ka bynta kiba ha Sohra ka MSOA kan sa leit ai hi sha Sohra.”
“Haduh mynta ki don tang 6 ngut ki nongmareh kiba nabar ri, baroh ki dei na Kenya lem bad ki nongmareh kiba na kylleng jong ka ri India. Na ka liang ka MSOA ka la pynkhreh ïa ki kali ki ban kit ïa ki nongïashim bynta kiba na ka nongbah Shillong ban leit sha Sohra ha kaba ki kali kin mih na IGP ha ka por 5 baje ha ka step jong ka 30 tarik,” u la bynrap.
Wat la ha u snem ba la dep ki la don tang kumba 700 ngut ki nongwan ïashim bynta, hynrei mynta u snem ki la nang bun ki nongïashim bynta ha kane ka kynti.
Ha kawei pat ka liang u Working President ka MSOA u Bah John F. Kharshiing u la pynpaw ka jingai khublei ïa ka Sorkar Jylla lyngba ka tnat ïalehkai kaba la ai jingkyrshan na kane ka marathon ha ka sien kaba ar. “Ngi kyrmen ba ngin dang lah ban ïai bteng ïa kane ka marathon na uwei u snem sha uwei pat khnang ban ïoh ïa ka met kaba koit ba khiah bad ha kajuh ka por ban kyntiew ïa ki kam jngohkai hapoh ka Jylla.”
