Shillong, Nailur 21
Ka shi kol ba la thep shwa ban wai da u Sunil Chhetri lyngba ka penalty ka la biang pura ïa ka kynhun ïalehkai phutbol ka ri India ban pynliem noh ïa ka Bangladesh da 1-0 kol ha ka jingïalehkai jong ka Group-A jong ka 19th Asian Games kaba la long ha ka sngi Palei ha Hangzhou.
Lyngba kane ka jingjop ka la pynlong ïa ka India ban don ha ka thup ka jingïaknieh bad kane kan shong ha ka jingïakhun kaba khatduh pyrshah ïa ka Myanmar ka ban long ha ka 24 tarik mynta u bnai.
Hadien ka jingshah rem ha ka China ha ka jingïakhun kaba nyngkong, kane ka kynhun hapoh ka jingïalam u Igor Stimac ka la pyrshang ban iakhun tyngeh naduh kaba sdang pyrshah ïa ka Bangladesh.
Hapdeng kane ka jingïakhun baroh ar kynhun kim shym la lah ban thep kol haduh kaba kut jong ka kylla step. Hadien ba la bteng ïa ka jingïakhun jong ka kylla miet baroh ar liang mamla kim shym la kheiñ sting ban pyrshang ïa la ki kabu ksiar ba ki la ïoh, hynrei kim shym la lah ban pynurlong na ka daw ba baroh ar liang ki nongapkol ki la ïashan tyngeh ban kyrda na ka jingshah thep.
Hashwa ban kut artad ka jingïalehkai, u Bryce Miranda u la shah pynur hapoh box ha u rangïalehkai ‘dien ka Bangladesh u Rahmat Mia. Dei hangne ba ka India ka la ïoh ïa ka penalty ha kaba utei u kapten ka kynhun (Sunil Chhetri) um shym la pynlehnohei ïa katei ka kabu ksiar ha ka minit kaba 85 bad ban khur syndon ïa ka jingjop kaba nyngkong ha kane ka lympung.
Haba phai sha ka jingïakhun jong ki kynthei, ka India ka la mad ïa ka jingshah rem kaba nyngkong jong ka Group-B ha ka Chinese Taipei da 2-1 kol ha Hangzhou.
