Shillong, Nailur 22
Ka kynhun ki ‘thei ïalehkai jong ka Saiden Secondary School ka la lah ban pynthikna ban jam sha ka quarter final ha ka lympung ïalehkai 63rd National Level Subroto Cup 2023.
Kane ka jinglah ban pynthikna ka la wan urlong hadien ba ka lah ban pynjem khnap ïa ka Uttarakhand haduh 11-0 kol ha ka jingïalehkai kaba khatduh jong ka Pool-G ha ka sngi Thohdieng ha nongbah Delhi.
Ka Eiladki Ksoo bad ka Imaïa Shylla ki la khur ïa ka hat-trick, katba ka Daïamon Makroh ka la thep ar kol na ka bynta ban pynlong ïa kane ka kynhun ïalehkai ka Jylla ban bat ïa ka kyrdan ba hakhlieh na katei ka Pool bad kamai 9 point na ki lai sien ïakhun.
Kumba ka paw naduh kaba sdang, kane ka kynhun ïalehkai kaba na Nongpoh, Ri Bhoi District hapoh ka jingïalam u Bah Sumarlang Swer (coach) ka la lah ban ïalehkai ha kaba kam shym la ailad ïa ka liang pyrshah. Ka Eiladki ka la ïoh ban pynkhih jar nyngkong eh ha ka minit kaba 5, katba ka Daïamon ka la pynbud ïa ka kol kaba ar ha ka minit kaba 12. Hadien ar minit ka Eiladki ka la pynbud biang ïa ka kol kaba ar ka jong ka.
Kumjuh hadien katto katne por ka Daïamon ka la thep ïa ka kol kaba ar ka jong ka ha ka minit kaba 21 na ka bynta ban pynlong ïa ka Saidei ban tam da 4-0 kol.
Hadien shiteng kynta ka Saiden ka la pynbud biang ïa ka kol kaba san lyngba ka Barikor Kurbah ha ka minit kaba 30 bad hadien lai minit ka Imaïa Shylla ka la ïoh ban thep ïa ka kol kaba hynriew.
Ka Imaïa ka la thep biang sa ar kol ha ka minit kaba 39 bad 45 na ka bynta ban khur syndon ïa ka hat-trick. Kumjuh ïa kawei pat ka hat-trick la khur da ka Eiladki hadien ba ka la ïoh ban thep sa ar kol ha ka minit kaba 42 bad 60. Ïa ka kol kaba khatduh la thep da ka kapten kane ka kynhun ka Daphishisha Syngkli ha ka minit kaba 52.
Kumba ka paw ha ki ar tylli ki jingïalehkai ba la lah, ka Saiden ka la jop ïa ka Goa da 2-0 kol bad ïa ka Kendriya Vidyalaya Sangathan (KVS) da 4-0 kol. Te kumta kane ka kynhun ïalehkai ka Jylla kan pynkhreh ïa ka jingïakhun quarter final ha ka sngi U Blei (24 tarik) pyrshah ia ka NCC kaba Mizoram.
