Shillong, Nailur 22
Ka kynhun ïalehkai phutbol ka ri India ka la shah pynhiar da lai kyrdan kata sha kaba 102, kat kum ka jingpyllait da ka FIFA ia ki kyrdan jong ki ri ka pyrthei ha ka sngi Thohdieng.
Watla dangshen ka India ka la bat ïa ka kyrdan kaba 99, hynrei ka jinghiar ha ka rukom ïalehkai ha ka King’s Cup, ha kaba ka India ka la shah rem ha ka Iraq ha ka semi-final bad ruh ha ka Lebanon ha ka jingïaknieh ïa ka kyrdan balai.
Ka King’s Cup kaba la long ha Thailand, ka long ka jingïakhun kaba kongsan na ka bynta ka India hashwa ban ïakhun ïa ka AFC Asian Cup kaba la thmu ban pynlong ha Qatar ha kaba ka la long ka kabu ksiar ban ïatyngjuh bor pyrshah ïa ka kynhun kaba khlaiñ bor kum ka Iraq. Watla ka India ka la khmih lynti ban ïalehkai bha, hynrei ka la kylla da khongpong.
Kumba ka paw ha katei ka semi final jong ka King’s Cup, baroh ar ki kynhun ki la ïakhaid mar 2-2 kol haduh kaba kut ki 90 minit. Hynrei dei ha ka tie-breaker ba ka India ka la shah rem noh da 5-4 kol. Kumjuh ha ka jingïaknieh ïa ka kyrdan balai, ka India ka la shah rem sa ha ka Lebanon da 1-0 kol.
