Shillong, Nailur 22
U MLA ka Voice of the People Party (VPP), Bah Ardent M. Basaïawmoit ha ka Sngi Thohdieng u la khie khluit ïa u Myntri Rangbah ka Jylla, u Conrad K. Sangma bad kob ruh ïa u sha ka rynsan ïatyrko-nia.
Katei ka la wan jia ha ka por ba u Sangma u dang jubab ïa ka ‘Call Attention’ ba la wanrah da u nongmihkhmat ka VPP na Nongkrem hapoh ïingdorbar halor ka jinghiar shatrai jong ka rukom im hapoh ka Jylla.
Haba ïeng ban wanrah ïa ka ‘Point of Order’, u Bah Basaïawmoit u la ong ba kan ym dei ban don kano-kano ka jingïatai ha kiba kum kine ki mat ïatai ha ka por ba pynsngew ïa ka.
Lyngba u Lamphang u la buh jingkylli ba hato u shah mo ban don ka jingïatai bad lada hooid, kata u long uba kloi ban ïatai halor katei ka mat.
“Kam mut ba phin shim kabu ïa kane ka ‘Call Attention’ bad pynpaw katba phi sngew, ngi ruh ngi don. Haba phi kren shaphang ka rukom pyrkhat, ngi ruh ngi tip kaei ka rukom pyrkhat,” u la ong.
Ha kajuh ka por, haba buh jingkylli ïa u Myntri Rangbah halor ka rukom pyrkhat, u Bah Basaïawmoit u la ong ba tang namarba la pynsngew ïa ki mat ba ïadei bad ka Jylla ym lah ban ong ba dei kiba khim jingmut.
“Kren beit thik tang ïa ka ïa ‘Call Attention’. Pynsngew halor ki jingkdew kiba nga la wanrah. Lada phi kwah ban ïatyrko-nia, to ngin don da kawei pat ka rynsan ban ïatyrko-nia,” ong u MLA.
Haba kren halor ka ‘Call Attention’, u la ong ba ka jingthmu ka Sorkar ban pynlong ïa ka Jylla kum ka ‘10 Billion Dollar Economy’ ka long tang ka jingphohsiew kaba jngai.
Ha kawei ka liang, u la ong ba ha ka jingshisha, ka Sorkar Jylla kam pushe ïa ka jinglong-jingman jong ka ïoh ka kot ka Jylla.
Haba pynsngew ba ka Jylla ka wan ba ar (na kiba duna tam) haba phai sha ka ‘Per Capita Income’, u Bah Basaïawmoit u la buh jingkylli ïa ki Myntri Sorkar ba shaei ki buh ïa ka jingsngew jong ki haba ki paidbah kim lah ban pynbiang wat tang ïa ki jingdonkam ha ka jingim (jong ki) katba ka Jylla ka dang pyrkhat ban pynlong tamasa.
“Ïano bad ïa kaei ngi ïa rakhe. Kumta nga dawa jur na ka Sorkar ban pynsangeh ïa baroh ki jait tamasa da kaba pyrkhat ïa u duk u suk,” u la ong da kaba bynrap ba ka jingpyrshang jong ka Sorkar ban pynlong ïa kine ki tamasa ka long tang ba kynriah na kaba pynleit jingmut ïa ki mat kiba donkam.
Na ka liang u Myntri Rangbah haba ïada ïa katei u la ong, “Ki briew kiba la wanrah ïa kane ka kaiphod halor katei ka bynta ki la buh ka ‘disclaimer’ da kaba ong ba ki kubur ïa ka jingbym lah ban pynkut ïa kine ki jingkdew ha madan.”
Halor ka thong ba ïadei bad ka ‘10 Billion Dollar Economy’, u Sangma u la buh jingkylli ba hato kam dei ka jingkitkhlieh kum ki nongïalam bad ka Sorkar ban ai ka jingkdew lynti ïa ka Jylla.
“Lada u nongïalam um lah ban kdew lynti ne ai jingkyrmen, kata ngi la pulom ha ka kamram,” u la ong.
Haba kubur ba ki don ki jingtynjuh, u Myntri Rangbah u la ong ba dei ban tip ïa ki jingeh bad jingbakla – hynrei kaba donkam na baroh ka long ban don ïa ka thong bad ka jingïohi jngai kumno ban ïaid shakhmat.
“Ha nga, nga ngeit ba ngin sa kynjoh ïa ka ‘10 Billion Dollar Economy’ bad ngin sa poi ha ka kyrdan ‘Top-10’ hapoh ka ri. Ngin sa kynjoh ïa kane. Ki jingkheiñ kiba ngi la pyni ha ki 5 snem ba la dep ki kdew shata,” u la ong.
Haba phai sha ka jingpynlong ïa ki tamasa, u Myntri Rangbah u la pynsngew ba kine ki khring ïa bun bah ki nongwan jngoh kai bad ki ban ïoh jingmyntoi na kine kin dei hi ki nongshong shnong ka Jylla.
“Ka ïoh ka kot ruh kan sa kiew. Lada ka Meghalaya ka hap ïaid shakhmat, ngi donkam ba don ïa kine ki prokram ba ïadei bad ki kam jngoh kai,” u la ong.
Shuh shuh u la bynrap, “Ngim lah ban khim jingmut. Ngin hap ïar ka jingmut-jingpyrkhat. Lada ngi ïai bteng ban khim jingmut kumne, ngin ym kiew. ‘U la ong ba ym dei hi ban don tamasa’ – nga panmap, nga sngewsih shisha, ka jinglong khim ha ka jingïohi jngai jong u dkhot uba la wanrah ïa kane ka mat,” u la ong.
